Seanca gjyqësore në GJKKO për çështjen “Gërdeci” dhe ish-ministrin e Mbrojtjes Fatmir Mediu që akuzohet për shpërdorim detyre të dyfishtë sipas Kodit Penal dhe Kodit Penal Ushtarak, është shtyrë për në datën 9 maj.
Shkak për shtyrjen e seancës është bërë kërkesa e prokurorisë pasi organi i akuzës nuk ishte gati për të dhënë konkluzionet mbi hetimet.
Ndërkohë pala mbrojtëse e Mediut kërkoi pushim të çështjes për efekt parashkrimi duke argumentuar se kanë kaluar 12 vite nga fakti penal, ndaj sipas tyre Mediu nuk mund të merret i pandehur.
“Pas gati 2 vjetësh hetime të reja të SPAK-ut që prodhuan zero rezultat, çështja është e pamundur për të vijuar më tej për shkak të parashkrimit”, tha avokati i ish-ministrit, Ardian Visha.
Ndërkohë, togat e zeza të GJKKO kanë pranuar gjykimin e shkurtuar.
Sakaq, Zamira Durda, e cila humbi djalin e saj 7-vjeçar në shpërthimin famëkeq të Gërdecit ishte në sallë së bashku me familjarë të tjerë, por nuk u pranua nga GJKKO si palë në gjykim.
Avokati i familjarëve të viktimave të Gërdecit në një prononcim për media tha se është e paarsyeshme që të mos jenë në seanca.
“Sot gjykata vazhdoi me të njëjtën mënyrë duke mos na lejuar të jemi pjesë e procesit. Kërkesa vinte nga 6 persona, të gjithë me statusin e personit që kanë humbur një familjar të tyre, 4 janë plagosur rëndë, janë të dëmtuar të shumëfishtë. Gjykata nuk e mori në konsideratë, vazhdoi duke thënë se e kemi thënë herën e kaluar që s’do behën pjesë. Një vendim të zbardhur nuk ka. Ende nuk e dimë pse nuk jemi pjesë e procesit, ligji e thotë qartë që duhet të jemi. Është ende e kuptueshme përse po vepron në këtë mënyrë situata. Arsyeja që më vjen ndërmend është se nuk do që ky proces të hyjë në detaje. Kemi studiuar dosjen që prej 15 vjetësh, gjykata mesa duket do që t’i bie shkurt çështjes dhe nuk ka do nëpër këmbë. Është e disata herë që ndodh”, tha avokati Dorian Matlija.
Ndërkohë vetë zonja Durda në reagimin e saj pas shtyrjes së seancës, i ka kërkuar sot gjyqtares së çështjes vendimin e zbardhur dhe bërjen e saj palë në proces.
Durda thekson se ka 15 vite që endet dyerve të gjykatave dhe kërkon drejtësi për të birin.
“Dua drejtësi për djalin tim. Zonja gjyqtare me jepni vendimin e zbardhur, pse nuk u pranova si pale ne proces. Kam 15 vite qe enden dyerve tuaja”, tha Zamira Durda në sallën e gjyqit.
