Kryetari i PD-së, Sali Berisha u shpreh këtë të Hënë se kryebashkiaku socialist i Kamzës, Rakip Suli ka një “dosje të hapur” në Greqi.
“Rakip as në Greqi s’pranohesh më se të kanë hap dosje atje mesa mora vesh. Po, po! Po të garantoj se ato para kudo ti kesh dërguar do ti gjejmë dhe do dënohesh. Nuk ka më amnisti për qeveritarët hajdutë. Qeveritarët hajdutë do ti ndjekë vjedhja gjer në ditën e fundit të jetës së tyre. Ju jap fjalën ju dhe kjo do të bëhet”, tha Berisha nga Kamza, gjatë një takimi krah kandidatit të koalicionit “Bashkë Fitojmë” për këtë bashki, Arjan Hoxha.
Gjatë fjalës së tij, Berisha vlerësoi Hoxhën, ndërsa tha se më 14 Maj votohet edhe për të shpërbërë pushtetin monist dhe për të vendosur përsëri sistemin demokratik.
“Ju garantoj se Arjan Hoxha, kandidati i vullnetit dhe votës tuaj, kandidati i dinjitetit tuaj, do të shkrijë të gjithë energjitë e tij, të gjithë mendjen me përkushtimin më të madh, do të bëjë gjithçka që së bashku me ju ta ndryshojë me shpejtësi gjendjen në bashkinë e Kamzës. Do të bëjë gjithçka që taksat tuaja ti shndërrojë në shërbime për ju të merituara. Arjani do të jetë një shërbëtor i përulur i qytetarëve të Kamzës. Një administrator i aftë, i zoti, dhe i ndershëm, do të jetë një drejtues vizionar për transformimin e Kamzës”, tha Berisha.
“Me 14 maj, Kamza ndahet dhe Shqipëria, nga sistemi më i keq që ka njohur njeriu dhe njerëzimi, nga sistemi i të gjitha pushteteve në duart e një njeriu, në duart e një individi. Çdo analizë që mund ti bëjmë historisë dhe të shkuarës do të gjejmë se regjimet më të këqija, më ç’njerëzore, më jo popullore, kanë qenë regjimet në të cilat një njeri i ka kontrolluar të gjitha pushtetet. Dhe ky është rasti i Shqipërisë sot. Edi Rama i kontrollon sot të gjitha pushtetet e këtij vendi dhe e vërteta është se kontrollon të gjithë ekonominë, financat, gjykata, polici, SHISH, presidencë dhe çdo institucion tjetër. Në këto kushte me 14 maj, ne votojmë jo vetëm për të vendosur Arjan Hoxhën qytetar të parë në Bashkinë e Kamzës, por votojmë për të shpërbërë pushtetin monist të Edi Ramës, votojmë për të rivendosur pluralizmin në Shqipëri. Votojmë për të vendosur përsëri sistemin demokratik”, shtoi ai.
Kryedemokrati u shpreh më tej se “vetëm me djegësat që u gjobisin ju çdo ditë, Erion Velaij, Edi Rama, Rakip Suli plaçkiti 420 mln euro”.
“Vetëm me djegësat dhe ju paguaji, për çdo ton hedhurina, 29 euro në minierën e floririt në Sharrë të Edi Ramës dhe Erion Veliajt, gjoja për ti djegur. Që të gjitha depozitohen dhe nuk digjet asnjë ton. Paratë përfundojnë ofshore dhe në Iran. Të gjitha janë tuajat”, tha ai.
Sipas Berishës, Rakip Suli ka vjedhur me fondet publike.
“Shikoni çfarë bën Rakip Suli me Erion Veliaj. Të vetmet që nuk u prekën nga tërmeti, ose u prekën më pak se çdo gjë tjetër, ishin shkollat. Shkollat i morën dhe i rrafshuan për të vjedhur 70-80% të shumës së përdorur për rindërtimin e tyre. Po çfarë pësoi Kamza. Kamzës ju shkatërrua arsimi. Nuk ka mësim me 3 turne miqtë e mi. Unë kam qenë pedagog vetë, po çdo njeri, jo më fëmijët, por as me studentët e rritur me 3 turne se bën dot mësimin. Dhe këtë e bëri Rakip Suli, vetëm e vetëm për xhepin e tij, këtë e bëri Erion Veliaj, vetëm e vetëm për xhepin e tij. Në qoftë se do të mendonim, hajde për të rriturit, por të paktën për fëmijët e qytetarëve ata nuk mund ta bënin kurrë një akt të tillë, ata nuk mund të mendonin kurrë të fryheshin si shushunja me paratë e shkollave. 6 milionë euro e ndërton shkollën ‘Sami Frashëri’, Erion Veliaj. Me 6 milionë euro ndërtohen të paktën 7-8 shkolla. 7.2 milionë euro rindërton shkollën ‘Hillary Clinton’ Rakip Suli në Kamzë. Shih çfarë janë këta more. Këta vjedhin në çdo gjë, këta vjedhin në çdo pemë, në çdo gropë, në çdo bankë, këta vjedhin në çdo shkollë“, tha kryedemokrati.
