Nga Tepelena, ku mbrëmjen e sotme prezantoi Baftjar Imerin si kandidatin e koalicionit opozitar “Bashkë Fitojmë” për zgjedhjet lokale të 14 majit, kryedemokrati Sali Berisha i ka bërë thirrje kryeministrit Edi Rama për një debat televiziv.
Thirrja e Berishës erdhi pasi më parë i renditi kreut të qeverisë të gjitha akuzat për abuzime me tenderat publikë, duke e denoncuar se ia ka dhuruar paratë e taksapaguesve shqiptarë klientëve të qeverisë dhe familjarëve të tij.
“Paraja po shkon e gjitha tek qeveritarët dhe klientela e tyre, që tashmë janë jo vetëm biznesmenë por familjarët e tyre. I them Ramës hajde këtu t’i bëjmë radiografi njëri tjetrit. I ke dhënë baxhanakut dhe thjeshtrës mbi 100 tendera. Yt vëlla është i përzier në aferat më të pista, të cilat jo shqiptarëve por edhe europianëve i kanë vjedhur 2 mln euro. Hajde zoti Edi para këtyre burrave ose ku të duash dhe nxjerrim familjarët e ki dhe të tutë sa tenderë kanë fituar. Zero. Sepse ky është ligji. I vëllai i bashkisë së Matit vetëm në ujësjellësin e Tiranës ka fituar 30 mln euro tenda. I vëllai i Qefalisë fiton miliona euro tendera në Kamzë. Paratë i ndajnë me njëri tjetrin e shkelmojnë ligjin”, tha Berisha.
Më pas ai argumentoi se ballafaqimi i tij me Ramën mund të realizohet në çdo moment nëse kreu i ekzekutivit pranon që të nxjerrin me detaje tenderat e fituara nga familjarë e të dyve.
Në vijim Berisha paralajmëroi kryeministrin se do të ketë fatin e ish-agjentit të FBI, i arrestuar në SHBA, Charles McGonigal.
Berisha tha nga Tepelena se çështje e hapur penale, siç edhe shprehen zyrtarët e lartë të DASH, do të thotë derë burgu e hapur edhe për kryeministrin e Shqipërisë.
“Edi Rama i erdhi fundi, i erdhi fundi ju them unë ju, e pret McGonigal. Po Edi, ta tha i dërguari i fundit që ajo është një çështje e hapur, që ajo është një çështje e hapur penale dhe aty ku ka drejtësi, çështje e hapur penale, do të thotë derë burgu e hapur, qeli e hapur.
Po pse e them unë këtë, e them unë këtë, se McGonigali po dënohet se ka marrë ryshfet nga njerëzit e kryeministrit shqiptar, kryeministri shqiptar. Atëherë gjykatësi nuk mund të dënojë ryshfetmarrësin dhe të mos dënojë ryshfetdhënësin.
Edi Rama është i përfunduar. Qytetarë duhet të jeni të vetëdijshëm, votohet një njeri i cili absolutisht siç e dëgjoi vetë, ka çështje penale të hapur. McGonigal është çështje penale e hapur, dhe dy janë personazhet kryesore që gjykohen; Edi Rama kryeministër i Shqipërisë, Oleg Deripaska, oligarku i Putinit, i cili ka marrë edhe në dhjetor të vitit 2022, nga qeveria e Edi Ramës, 7 milionë euro për rikonstruksionin e një shkolle në Kamzë”, u shpreh Berisha.
