Nga Boldnews.al
Mazhoranca ka nxjerrë artilerinë e rëndë për zgjedhjet lokale. Në datën 14 prill 2023, ditën që në Shqipëri hyri në fuqi fushata zgjedhore për zgjedhjet e 14 majit, Ministria e Shëndetësisë ka hapur me shpejtësi një tender me vlerë rreth 3 milionë euro për rikonstruksionin e qendrave shëndetësore në Shqipëri.
Ministrja Ogerta Manastirliu ka urdhëruar vartësit për të bërë dokumentet, disa vite pasi i njëjti dikaster ka bërë një tender me objekt të ngjashëm. Pra, po ribën të njëjta Ambulanca që i bëri pak vite më parë. BoldNews.al ka siguruar dokumentet e këtij tenderi, që është shtrirë në të gjithë vendin, teksa synimi është padiskutim vota e 14 majit. Me premtime në letra, kandidatët e mazhorancës do të paraqiten në Njësitë Administrative për të prerë shiritat e fillimit të punimeve.
Në dokumentin e mësipërm, saktësohet se “afati i fundit për paraqitjen dhe hapjen e ofertave është data 2 maj 2023 në orën 10:00”. Pra, 12 ditë para zgjedhjeve, çka u mundëson zyrtarëve të Manastirliut që të shpallin fituesin, të lidhin kontratën dhe të paktën të shkojnë në këto Njësi Administrative apo fshatra për të prerë shiritat e fillimit të punimeve.
Ndërkohë që nëse do të bëhen ose jo, kjo ngelet për t’u parë. Sipas dokumenteve që disponon BoldNews.al, objekti i prokurimit është “rikonstruksion i qendrave shëndetësore (viti 2023-2024)” dhe kanë një fond limit prej 282.593.642 lekë pa TVSH, ose me TVSh rreth 3 milionë euro. Tenderi është ndarë me lote.
Lista e Qendrave Shëndetësore që pritet të rikonstruktohen
Loti i parë i këtij tenderi është “rikonstruksion i disa QSH-ve në qarqet Tiranë dhe Durrës”, teksa parashikohen të bëhen 17 objekte me fond 51 milionë lekë. Afati i realizimit të punimeve do të jetë për 172 ditë, ndërsa do të shtrihet në disa qytete dhe Njësi Administrative.
Ndërkohë, loti i dytë është me objekt “rikonstruksion i disa QSH-ve në qarqet Berat, Korçë dhe Elbasan”, ku janë 16 objekte me fond limit 63 milionë lekë. Kësaj here, në dokumente shkruhet se afati i realizimit të punimeve është për 180 ditë pas nënshkrimit të procesverbalit të fillimit të punimeve për objektin e parë.
Loti i tretë është “rikonstruksion i disa QSH- ve në qarqet Shkodër, Kukës, Lezhë, Dibër”, ku do të rikonstruktohen 11 objekte me fond limit 93 milionë lekë. Kësaj herë me një afat të realizimit të punimeve për 195 ditë.
Loti i katërt është “rikonstruksion i disa QSH- ve në qarqet Gjirokastër, Vlorë dhe Fier”, 16 objekte, me fond limit 75 milionë lekë. Afati I këtij loti është për 185 ditë.
Ndërkohë, BoldNews.al hulumtoi edhe dokumentet e mëparshme të Ministrisë së Shëndetësisë, e cila sa herë ka zgjedhje bën tendera të tilla. Në vitet 2018 dhe 2019, kjo ministri bëri dhe filloi punimet për rikonstruksionin e disa Qendrave Shëndetësore në të gjithë Shqipërinë.
Por, atyre iu doli boja menjëherë, pasi shumica janë braktisur dhe të tjera të shkatërruara, pavarësisht se janë ndërtuar në 5 vite të fundit.
Sipas dokumentit të mësipërm, në vitin 2018, Ministria e Shëndetësisë hapi tenderin me objekt “rikonstruksione të Qendrave Shëndetësore (QSH) në qytete/njësi administrative” në të gjitha qarqet e Shqipërisë. Nëse do të shohësh edhe fondet, janë të njëjta me ato të akorduara në 2023-shin.
Në atë kohë, janë shpenzuar rreth 2.5 milionë euro, ndërsa disa nga Qendrat Shëndetësore janë të njëjta me ato që po rregullohen këtë vit. Pra, të dashur qytetarë, për rikonstruksonin e ambulancave të tjera duhet të presim vitin 2027, kur të bëhen zgjedhjet e ardhshme vendore.
