Nga Boldnews.al
Burime mediatike deklarojnë se Ilir Beqja ka refuzuar të marrë mandatin e deputetit të lënë bosh nga Benet Beci, duke shënuar kështu një humbje të rëndë për betejën anti-korrupsion të maxhorancës parlamentare socialiste.
Benet Beci dha dorëheqjen nga mandati parlamentar, pasi ai po kandidon për postin e kryetarit të Bashkisë së Shkodrës.
Sipas listës së kandidatëve për zgjedhjet e përgjithshme të vitit 2021, pas Becit, vendi i parlamentarit i takon Ilir Beqjas.
Por, ky i fundit duket se nuk preferon të jetë “lojtar që vjen nga stoli” në ekipin parlamentar të Edi Ramës dhe ka vendosur të qëndrojë në linjën e parë të luftës kundër korrupsionit-atë të drejtimit të Agjencinë Shtetërore të Programin Strategjik dhe Koordinimit të Ndihmës.
Më saktësisht, Ilir Beqja është krye-monitoruesi i shpenzimit të fondeve që Bashkimi Europian jep për asistencë në vendin tonë.
Ai u emërua në këtë detyrë në fund të dhjetorit 2021, me firmë të kryeministrit Edi Rama.
Në daljen e parë publike nga pozicioni i drejtorit të “fondeve të BE-së”, Beqja deklaroi se Agjencia “do t’i japë zgjidhje një shqetësimi të kahershëm të komunitetit të donatorëve, atë të rimbursimit të TVSH-së për ato raste kur institucionet përfituese të projekteve nuk kanë qenë në gjendje të programojnë si duhet në kohë buxhetet e tyre respektive”.
Është interesante se si një personazh i rëndësishëm politik, vendos të heqë dorë nga mundësia për t’u shërbyer interesave të votuesve në Parlament. Por, duket se ka vendosur që interesat e qytetarëve t’i mbrojë më së miri në Agjencinë “milionere”.
Ilir Beqja ka dhënë prova të fuqishme se ai është luftëtar i paepur në mbrojtje të financave publike dhe jetës e shëndetit të qytetarëve.
Si Ministër i Shëndetësisë, në mandatin e parë të Edi Ramës (2013-2017), Ilir Beqja nënshkroi 4 kontrata koncesionare, me vlerë miliona euro- “Checp Up”, “Hemodializën”, “Laboratorët” dhe “Sterlizimin”.
Kontratat u fituan nga personazhe të njohur për afërsinë me Edi Ramën dhe qeverinë e tij apo për kompani off-shore, megjithëse Ilir Beqja u përbetua se ato ishin vetëm në shërbim të qytetarëve.
Por, persona “dashakeqës” me Ilir Beqjan, nuk arritën ta kuptonin qëllimin pozitiv të Ilir Beqjas dhe kanë kallëzuar këto koncesione pranë Prokurorisë së Posaçme-SPAK.
Prokurorët e posaçëm, në verën e vitit 2022, u duk se ecën me shpejtësi në këto hetime dhe Ilir Beqja me çantën e tij sportive u pa disa herë të hynte në zyrat e SPAK-ut.
Pas vrullit të parë, prokurorët bën një tërheqje, duke i krijuar mundësinë Ilir Beqjas që të rikthehej sërish në zyrën e mirë shtetërore, siç është ai i menaxhimit të fondeve të BE-së.
