Policia ka dalë me njoftim zyrtar lidhur me ngjarjen që ndodhi ditën e sotme në shkollën 9-vjeçare të Memaliajt, ku një mësuese u dhunua fizikisht nga një familjare e një nxënëseje.
Blutë bëjnë me dijen se është proceduar penalisht shtetasja S.K, 41-vjeçe, e cila dhunoi mësuesen.
Ngjarja ndodhi ditën e sotme, pas një konflikti të çastit për motive të dobëta. 41-vjeçarja është tezja e një nxënëseje të shkollës.
Dyshohet se ngjarja ka ndodhur për shkak të bullizimit dhe keqtrajtimit që tezja ka pretenduar se është bërë ndaj fëmijës.
Njoftimi i policisë:
Memaliaj
Dhunoi fizikisht një shtetase (mësuese), procedohet penalisht 41-vjeçarja.
Shërbimet e Stacionit të Policisë Memaliaj referuan materialet në Prokurori dhe nisi procedimi në gjendje të lirë për shtetasen S. K., 41 vjeçe, për veprën penale “Goditja për shkak të detyrës”.
Ditën e sotme, në ambientet e shkollës 9-vjeçare Memaliaj, pas një konflikti të çastit për motive të dobëta, 41-vjeçarja (familjare e një nxënëseje) ka dhunuar fizikisht një mësuese në këtë shkollë.
Materialet procedurale në ngarkim të shtetases S. K. i kaluan Prokurorisë pranë Gjykatës së Rrethit Gjyqësor Gjirokastër, për veprime të mëtejshme.
