Kandidati i opozitës për Tiranën, Belind Këlliçi vë theksin te shtresat e popullsisë që përfitojnë nga transporti urban falas.
I ftuar në Panorama Tv, pyetjes së analistëve në studio se çfarë synon konkretisht transporti falas, Këlliçi u përgjigje se kjo nismë është për të lehtësuar koston e jetesës për mijëra familje në nevojë.
“Inkurajimi i përdorimit të transportit publik do të nxisë qytetarët të mos përdorin mjetet private, si rrjedhojë kjo ndikon në uljen e trafikut dhe dotjes në kryeqytet”, tha kandidati demokrat.
Kandidati i opozitës ka shpjeguar se në turin e dëgjesave me bizneset në disa rrugë emblematike të Tiranës rezulton se korsitë e biçikletave nuk janë efikase.
“Ngushtimi i rrugëve, ndalim qëndrimi i automjeteve në këto rrugë po çon në falimentimin e bizneseve në këto rrugë. Për këtë arsye në disa rrugë të tilla do të harmonizohet infrastruktura që korsia e biçikletave të futet nëpër lagje“, theksoi Këlliçi.
