Nga Boldnews.al
Bashkitë, kryetarët dhe kandidatët janë vënë në “radhë” për të përdorur muajin e shenjtë të Ramazanit për fushatë. Para pak ditësh, BoldNews.al publikoi një shkrim, ku disa drejtues të pushtetit lokal dhe qendror po shtronin iftare për besimtarët, me të vetmin qëllim; zgjedhjet e 14 majit. Drekat “haram” iu serviren gjithmonë një numri të madh personash, qoftë edhe të besimeve të tjera, për t’i bashkuar. Jo në Fe’, por në votë!
Dhe, kur kaluan disa ditë nga publikimi i këtij shkrimi, Bashkia e Hasit ka hapur një tender për shtrimin e një iftari, me taksat e banorëve. Disa vite më parë, qeveria nxori një urdhër ku ndalonte të gjitha institucionet të bënin tender për dreka-darka. Natyrisht, kryetari i Bashkisë së Hasit, mund ta shtrojë me paratë e tij këtë iftar, pasi rroga dhe kursimet besoj ia lejojnë një shpenzim të tillë. Aq më tepër në këto ditë fushate.
Megjithatë, kryetari e cilëson si një rast të mirë që të mbledhë vota, duke i bërë qejfin një komuniteti fetar për një “vakt ushqimor”. Sipas dokumenteve që disponon BoldNews.al, Bashkia e Hasit ka hapur tenderin me objekt “Iftar për muajin e Ramazanit, sipas situacioneve”.
Fondi limit i kësaj procedure është 250,000 lekë, ndërkohë pritet që këto ditë të shtrohet edhe një iftar i tillë. Në të njëjtin dokument shkruhet se bëhet fjalë për “shërbime fetare” dhe “shërbimet administrative rekreative, kulturore dhe fetare”. Por Bashkia nuk është objekt kulti, por një institucion shtetëror që taksat e banorëve i përkthen në investime, në të mirën e komunitetit.
Megjithatë, kryetari Liman Morina, është “mësuar” me të tilla “punë”, pasi disa muaj më parë u bë i famshëm për deklaratën e tij pas humbjes së jetës së Mbretëreshës së Britanisë së Madhe, Elisabeth II. Ai ngushëlloi gjithë shqiptarët që ndodhen në Mbretërinë e Bashkuar. Në fund, mesazhin të tij e mbyll duke theksuar se “Mbretëresha ka vend të veçantë në zemrën e çdo personi nga Hasi dhe kujtimi i saj do të mbetet i paharruar për ta”.
Disa ditë më parë, redaksia e BoldNews.al shfletoi faqet zyrtare në rrjetet sociale të disa kandidatëve për kryetarë bashkie, të cilat ishin të mbushura me foto në lokale ku shtrojnë iftar për besimtarët dhe nxjerrin nga fjalorthi i tyre dedikime me thënien e librave të shenjtë, për të synuar shenjtërinë e pushtetimit në vijim. Po kush paguan për këtë iftar? Paguan kandidati që ka mbajtur për disa vite drejtimin e bashkisë, paguan drejtori i një institucioni diku në kadastër, doganë, port, OSHHE, KESH, ujësjellës e kudo tjetër, ky fjala korrupsion nuk quhet mëkat apo shkelje ligji, por meritë për të ngjitur edhe më lart shkallët e karrierës politike. Në majën e shfrytëzimit të muajit të shenjtë të Ramazanit nuk ka si të mos qëndrojë kreu i bashkisë së Tiranës Erion Veliaj.
LEXO EDHE:
