Deputetja e Partisë së Lirisë, Monika Kryemadhi, deklaroi se pronari i ri i televizionit kombëtar, Top Channel, është Mirel Mërtiri, i konsideruar nga Prokuroria Speciale si “bosi” faktik i inceneratorit të Elbasanit dhe i shpallur në kërkim për korrupsion dhe pastrim parash.
Kryemadhi deklaroi se ka të dhëna që pas kompanisë off-shore të regjistruar në Belize, “Ëestern Conglomerate Media”, e cila rezulton se ka blerë Top Channel është Mërtiri.
“Top Channel nuk përfaqësohet më nga familja Hoxha, pasardhësit e Dritan Hoxhës, por është një kompani offshore, përfaqësohet nga Edi Rama, Erion Veliaj, nga Mirel Mërtiri. Kjo kontrata këtu që i ka nxjerrë ky zotëria, e kujt është, ku është shitur tek një kompani ofshore? Është akt juridik në Basel. Pse nuk është regjistruar në QKB kjo? Sepse me ligjin e mediave shqiptare nuk lejohet që frekuenca kombëtare të jetë në offshore”, deklaroi deputetja në emisionit “Të Paekspozuarit” të Ylli Rakipit.
Kryemadhi iu referua një dokumenti të publikuar më herët gjatë këtij muaji në media. Sipas atij dokumenti, pronarët e Top Channel, përkatësisht Vjollca Hoxha dhe fëmijët e saj, kanë shitur të gjithë aksionet e tyre tek një kompani e regjistruar në zonën off-shore të Belize, në ishujt e Karaibeve.
Sipas Marrëveshjes së shit-blerjes, që mban datën 14 janar 2023, pronarët Hoxha e kanë shitur televizionin për një shumë prej 9 milionë dollarë.
Deri më tani, nga ana e televizionit nuk është dhënë asnjë sqarim publik për këtë Marrëveshje biznesi, ndërkohë që ajo nuk rezulton e depozituar në Qendrën Kombëtare të Biznesit.
Në qarqet mediatike flitet prej kohësh se “Top Neës”, televizioni bijë i Top Channel, është marrë nën administrimin e Mirel Mërtirit. Megjithatë, edhe për këtë pretendim publik, nuk gjenden ende dokumenta zyrtarë.
Monika Kryemadhi deklaron se kjo shitje e televizionit, nëse është reale, është në kundërshtim me kuadrin ligjor shqiptar.
“…Sepse me ligjin e mediave shqiptare nuk lejohet që frekuenca kombëtare të jetë në off-shore”, deklaroi ajo gjatë emisionit.
Mirel Mërtiri është konsideruar gjerësisht si një “personazh hije” në aferën e inceneratorëve. Ai është bashkëjetues i biznesmenes, Stela Gugallja, pronare e kompanisë “Albtek Energy” që ka fituar koncesionin e inceneratorit të Elbasanit dhe që gjithashtu është shpallur në kërkim nga SPAK-u, së bashku me pronarin de-facto të inceneratorëve, Klodian Zoto.
