Kryetari i PD-së, Sali Berisha tha se një pjesë e madhe e energjisë që duhet të shkonte për eksport, vidhet nga kryeministri Edi Rama dhe ministrja e Energjitikës, Belinda Balluku.
Komentet i bëri nga Hasi, ku prezantoi kandidatin e koalicionit “Bashkë Fitojmë”, Miftar Dauti. Berisha tha se kjo vjedhje realizohet përmes zbrazjes së digave dhe shitjes së energjisë me çmim të lirë te sekserët e qeverisë, që sipas tij, e shesin më pas me çmim më të shtrenjtë dhe ndajnë paratë. Ai tha se në vjedhje marrin pjesë edhe anëtarë të tjerë të qeverisë, të cilën ai e quan kriminale.
Kreu i PD u ndal dhe te plaga e emigracionit, ndërsa u shpreh se Rama ka plan ti zëvendësojë shqiptarët me bangladeshas.
Zgjedhjet e 14 Majit, i cilësoi “një mision i madh, identik me atë që ishim në vitin 1992, sot për t’u ndarë nga monizmi i dytë”.
“Rama ua mbyll dyert e universitetit me mesatare dhe ata kapin gomonet. Rama do t’i zëvendësojë shqiptarët me bangladeshas sepse thotë ata nuk votojnë, sepse Rama ka frikë dhe tmerr nga vota juaj. Në 14 maj ne votojmë për demokracinë. Sot në të katër anët e vendit shumica e shqiptarëve përjetojnë një shtrëngicë të madhe ekonomike. 83% e tyre duan të largohen nga Shqipëria. Kjo sepse mezi e mbyllin muajin. Kjo pasi dasmat dhe ditëlindjet u shndërrohen në ditë dhimbjeje, në pamundësinë për t’i festuar si duhet”, u shpreh Berisha.
“Ky ndërton një km autostradë 24 milion dollarë, kur në Europë nuk ndërtohet më shumë se 2-3 milion dollarë. Paratë i ndan dhe i vjedh. Dy vitet e fundit kanë shënuar një arritje historike për kombin. Falë hidrocentraleve të reja që janë ndërtuar, këto prodhojnë 58-60 % të energjisë që prodhohet në vend. Shqipëria me gjithë konsumin e saj, konsumon 7 miliard. 2 Miliard teprojnë, eksportohen dhe duhet të shkonin për investime. Por ato para vidhen. I zbrazin digat verës dhe energjinë që prodhojnë ua shesin sekservëve të tyre me 20-30 euro. Ajo Ballukja me Edi Raman. Këta sekserë që e blejnë energjinë me 20-30 euro e shesin në bursë me 150 euro dhe i ndajnë paratë me Ramën, Ballukun dhe anëtarë të tjerë të qeverisë kriminale të Ramës. 5 miliard euro ka marrë borxh Rama. Mund të rriteshin rrogat 6 herë. Të gjitha të shpërdoruara”, tha kryedemokrati.
Berisha u ndal dhe ato që i cilëson “pilula elektorale” të qeverisë. Ai tha se se me rritjen e çmimeve nga “bordet komuniste”, Rama u ka marrë pensionistëve një pension e gjysmë, ndërsa tani i ngushëllon se po u jep 5 mijë lekë.
Lidhur me kandidatin e PS për bashkinë Has, Berisha tha se është një person i cili figuron me dy emra dhe është arrestuar 5 herë.
“Halit dhe Beqir, në politikën shqiptare ke vetëm një shok e je unik. Je dënuar e arrestuar 5 herë, në burg në Greqi, Slloveni, Vernicë e Durrës. Këshilla ime është, nëse të thotë Rama ndonjë fjalë, thuaji, jemi vëllezër siamezë, sepse vërtetë jam i arrestuar në Greqi, kam dy emra, por edhe ti ke 2 emra, edhe Edi edhe Edvin. Ti je arrestuar në Milano, në Mynih për vjedhjen e ushqimit në kampe, po deshe të sjell edhe dëshmitarë, je arrestuar në Milano se shisje ikona të vjedhura, Nëse ka dy burra që i kanë provuar në politikë shqiptarë janë ata të dy”, tha Berisha.
