Prej orës 10:00 në Gjykatën e Hagës ka nisur seanca gjyqësore paraprake për katër nga ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi, të cilët akuzohen për krime lufte.
Teksa të katër ish-komandantët e UÇK-së kanë mohuar akuzat e prokurorëve të Speciales dhe janë deklaruar të pafajshëm, gazetari Xhemajl Rexha ka zbuluar detaje nga momenti i hyrjes së tyre në seancë, që u prit me kuriozitet.
Thaçi, Veseli, Krasniqi e Selimi prej dy vitesh e gjysmë ndodheshin në qelitë e paraburgimit të Hagës ndaj të gjitha kamerat ishin fokusuar tek ta.
Gazetari, i cili pati mundësi të hynte në ambientet e Gjykatës Speciale në Hagë tregoi për Euronews Albania se iu desh të linte celularin, laptopin dhe gjithçka për të parë pjesën brenda.
“Ishte një moment absolutisht shumë i veçantë. Ishte mundësia për të parë për herë të parë nga afër ish-presidentin Thaçi, zotërinjtë Krasniqi, Selimi, Veseli pas dy vitesh e gjysmë të mbajtjes në Hagë. Në galerinë publike fare afër gazetarëve ishin familjarët e tyre. Gjëja e parë që zoti Selimi bëri ishte përshëndetja e bashkëshortes. Ai ishte më në disponim. Thaçi ishte më serioz dhe mbante qëndrim”, u shpreh Rexha.
Gazetari nënvizoi se janë 10 krime lufte për të cilat akuzohen ish-liderët e UÇK-së.
