Banorët e Bërxullës ditën e sotme kanë dalë sërish në protestë për shkak se nuk janë dakord me zhvlerësimin që u bëhet pronave të tyre të cilat preken nga ndërtimi i aksit Thumanë – Kashar.
Prej 7 muajsh protestojnë për të drejtën e tyre por shteti dhe institucionet përgjegjëse nuk i përfillin duke i lënë në mëshirë të fatit. Indinjata më e madhe e tyre konsiston më shumë në injorimin e pushtetit qendror e vendor që as shkon të flasë me banorët, ndonëse e kanë kërkuar prej kohësh.
Ata thonë se kanë vendosur që sot të mos bllokojnë rrugën e Rinasit për shkak të kërkesës së policisë e cila ka deklaruar se sot ka delegacione që duhet të mbërrijnë në Tiranë.
Një nga banorët shprehet se ky është mirëkuptimi i fundit me policinë për sa kohë shteti qëndron indiferent ndaj problemeve të tyre. Sipas tij kjo bëhet për të sosur durimin e banorëve në mënyrë që ata të kalojnë në akte ekstreme.
“OST i thotë unë nuk i lëviz shtyllat, ju duhet të lëvizni gjurmën e rrugës. Ne këtë protestë e kemi spostuar për një arsye duke gjetur mirëkuptimin me policinë e shtetit. Nuk kemi dalë të bllokojmë rrugën për këtë arsye sepse në Tiranë ka delegacione.
Ky është mirëkuptimi i fundit që i japim policisë së shtetit. Nuk do ta kenë më mirëkuptimin tonë për sa kohë nuk na mirëkupton shteti. Ne si banorë po zbatojmë vetëm ligjin dhe po kërkojmë vetëm të drejtat tona. Ata heshtin dhe vetëm heshtin, Kjo është për të na sosur ne durimin që të kalojmë në akte ekstreme.
Pastaj do kalojë edhe durimi jonë sepse njerëzit janë në siklet dhe në hall sepse nuk dinë ku do akomodohen nesër kur të prishet banesa, Nuk na jepet asnjë informacion ku ndërtohen banesa. Nuk na jepet informacion se ku do ndërtohen rrugët dytësore, Nuk po kërkojmë asgjë. Janë 183 ditë protestë dhe ne nuk marrim asnjë përgjigje për kërkesat tona.
Zgjedhja jonë është për zgjidhjen e halleve të komunitetit tonë jo të na përfaqësojë politika. Ajo i shfrytëzon për interesat e vet personale. Nuk kemi nevojë për famë. Ne jemi hallexhinj. Edhe kur kanë shkuar nëpër protesta, ato janë shuar. Protesta jonë ka 7 muaj sepse është protestë që bëhet me njerëz që vërtetë kanë hall. Nuk është asnjë që ka ardhur dje dhe gjeti një terren dhe e pushtoi. Nuk ka pasur asnjë reagim nga institucionet e shtetit. Unë i jam drejtuar me kërkesa përditë”, deklaroi njëri nga protestuesit.
