Deputeti i Partisë Demokratike, Edi Paloka ka ironizuar situatën alarmante që ka pushtuar vendin tonë i cili pothuajse çdo ditë tronditet nga krimi dhe pa aftësia e Policisë së Shtetit për të zbardhur aktet kriminale.
Paloka duke iu referuar sulmit me kallashnikov ndaj Top Channel, ironizon duke thënë se nuk kemi pse të skandalizohemi kur në mes të ditës kryeministri Edi Rama sulmon mediat me tritol.
“Në një vend ku kryeministri, kryebandit sulmon mediat me tritol në mes të ditës, pse skandalizohemi kur krimi i rrugës godet me kallash në mes të natës?!’, shkruan Paloka në Facebook.
Kujtojmë se sulmi ndaj Top Channel vjen as një javë pas konfiskimit arbitrar të Prestige Resort, në pronësi të Irfan Hysenbelliut, pronar gjithashtu i Fokus Media Group ku bëjnë pjesë News 24, Panorama, Gazeta Shqiptare dhe jo vetëm. Qeveria shkeli këtë vijë të kuqe një ditë pas raportit të Departamentit Amerikan të Shtetit, që qortonte shembjen e Prestige Resort.
- Detaje/ Sulmi ndaj TCH, ekspertët e Policisë Kriminale nisen drejt Vlorës, ndalohen 2 shkodranë
Detaje të reja kanë dalë në dritë lidhur me sulmin me armë ndaj Top Channel ku mbeti i vrarë roja i sigurisë, Pal Kola.
Dy persona me banim në Shkodër janë ndaluar nga Policia në qytetin bregdetar të Vlorës. Ata kanë qenë duke lëvizur me makinë dhe janë ndaluar nga shërbimet në një pikë kontrolli, të ngritur menjëherë pas sulmit të ndodhur ndaj televizionit Top Channel.
Të dhënat janë të vakëta për shkak se grupi hetimor ruan me konfidancialitet të lartë hetimet, por mësohet se dy shkodranët janë ndaluar dhe shoqëruar në ambientet e Drejtorisë së Policisë së Vlorës.
Mësohet se drejt qytetit bregdetar janë nisur dhe ekspertët e Departamentit të Policisë Kriminale, për të marrë në pyetje paraprakisht dy personat e ndaluar dhe më pas t’i sjellin ata drejt Tiranës, për shkak se hetimet janë duke u kryer nga Policia dhe Prokuroria e kryeqytetit.
Më herët, është raportuar se në zonën e Vlorës janë kryer kontrolle të shumta nga Policia, pasi dyshohet se autorët e sulmit ndaj Top Channel kanë djegur makinën në Golem e janë drejtuar drejt qytetit bregdetar. Madje, kontrolle janë zhvilluar dhe në tokat në buzë të autostradës, sepse ka dyshime se një nga armët e krimit është hedhur në shkurre.
