Tre persona janë arrestuar nga policia e Malësisë së Madhe dhe Shkodrës që kanë sekuestruar 17 kg kanabis.
Ata akuzohen për veprën penale “Trafikimi i lëndëve narkotike”, kryer në bashkëpunim.
Droga, sipas bluve, do të trafikohej në Mal të Zi.
Aksioni
Policia njoftoi se aksioni erdhi “bazuar në inteligjencën informative se disa shtetas po transportonin me automjet, një sasi lënde narkotike, në drejtim të PKK Hani i Hotit, me qëllim trafikimin e saj, drejt Malit të Zi”.
“Në aksin rrugor Koplik – Hani i Hotit, në fshatin Grizhë – Malësi e Madhe, efektivët kanë lokalizuar dhe ndaluar automjetin e dyshuar tip ‘Benz’ që drejtohej nga shtetasi K.G. Gjatë kontrollit në automjet, në një valixhe, Policia gjeti 16 pako të mbushura me lëndë narkotike cannabis sativa dhe një qese plastmasi të mbushur po me lëndë narkotike cannabis sativa, me peshë totale 17 kilogramë, të cilat u sekuestruan në cilësinë e provës materiale, së bashku me automjetitn dhe tre aparate celuluare”, thuhet në njoftimin e bluve.
Në këto kushte, në pranga u vunë personat në bordin e automjetit:
-
- Klevis Gurraj, 20 vjeç, banues në fshatin Alijaj, Malësi e Madhe (drejtuesi i automjetit);
- Jozef Kaçaj, 19 vjeç, banues në fshatin Alijaj, Malësi e Madhe (pasagjer);
- Enes Osmani, 22 vjeç, banues në fshatin Shtoj i Ri, Shkodër (pasagjer).
