Nga Boldnews.al
Autoriteti Rrugor Shqiptar është përfshirë në një tjetër skandal për ndërtimin e Unazës së Re, teksa ka akorduar një shumë prej 4.5 milionë euro shtesë për vijimin e punimeve. Pra, nga njëra anë tenderon dhjetëra miliona euro me tendera normalë, dhe nga ana tjetër akordon fonde shtesë, duke ngritur dyshime të mëdha se po favorizohen të njëjta firma që u përfshinë në skandal edhe para disa viteve.
Megjithatë, mosndëshkimi nga institucionet ligjzbatuese, ka sjellë që drejtuesi i ARRSH-së, Evis Berberi, të bëjë çfarë të dojë me paratë publike, duke u dhënë firmave të caktuara miliona euro të tjerë.
Sipas dokumenteve që disponon BoldNews.al, Autoriteti Rrugor Shqiptar ka bërë gati procedurën me objekt “plotësimi, rakordimi dhe vazhdimi i punimeve rehabilitim i segmentit rrugor ‘Mbikalimi Pallati me Shigjeta – Rrethrrotullimi Shqiponja'”. Bëhet fjalë për lotin 3 të këtij aksi, i papërfunduar dhe i lënë prej kohësh në mëshirë të fatit. Punimet në këtë lot janë ndërprerë disa herë, ndërkohë që loti I dhe II kanë përfunduar prej kohësh dhe janë të aksesueshme. Por, çfarë e pengon ARRSH-në të kërkoj përfundimin e kësaj pjese? Apo edhe të detyrojë firmat kontraktore ta çojnë deri në fund atë investim? Natyrisht, zvarritjet e një pas njëshme do të mundësonin që ky Autoritet të shpenzojë akoma më shumë para’ dhe indirekt mund të përfitojnë të gjithë. Po përse tani dhe para zgjedhjeve? Ndoshta për t’i bërë qejfin Lali Erit, të paktën të presë ndonjë shirit nga Unaza e Re, për të marrë ndonjë grusht votash.
Në të njëjtin dokument, saktësohet se paratë për këtë investim do të jepen nga buxheti i shtetit, ndërsa fondi limit është plot 468.053.688 lekë, ose plot 4.5 milionë euro. Një shumë e konsiderueshme, pasi nuk bëhet fjalë për tender të ri, po për vijimin e një procedure që ka kushtuar dhjetëra miliona euro.
Në vitin 2018, sipas dokumentit të mësipërm, Autoriteti Rrugor Shqiptar ka akorduar një shumë prej 12 milionë eurosh për ndërtimin e Lotit III të Unazës së Re. Fitues të këtij tenderi ishte bashkimi i operatorëve ekonomikë “Victoria Invest Internacional & Victoria Invest shpk”. Fondi limit ishte plot 1.180.297.580 lekë, ndërsa objekti i kontratës “rehabilitim i segmentit rrugor, mbikalimi i ‘Pallatit me Shigjeta’ – ‘Rrethrrotullimi Shqiponja’ Loti III”. Pra, i njëjti për të cilin në mars të vitit 2023 do paguhet një shumë prej 4.5 milionë eurosh!
Në dokumentin e 2018-ës citohet se “qëllimi i investimit është ndërtimi dhe përfundimi i plotë i këtij aksi, duke bërë rehabilitimin e segmenteve rrugorë. Për të gjitha rrugët sekondare që lidhen me rrugët e shërbimit është dhënë si zgjidhje një tip nyje e trajtuar me ishuj trafiku, tabela sinjalistike përparësie dhe semaforë paralajmërues”. Por, megjithëse është e shkruar e zeza mbi të bardhë se “do bëhet ndërtimi dhe përfundimi i plotë”, sërish ajo pjesë nuk është ndërtuar akoma. Ndonjë përgjegjës? Natyrisht drejtuesit e ARRSh-së dhe të firmës zbatuese, të cilët kanë xhiruar dhjetëra miliona euro dhe sërish gjendja është e njëjtë!
