Në një ditë pushimi zyrtar dhe pa asnjë vendim gjykate, por vetëm me urdhër të Këshillit Kombëtar të Kontrollit, forcat e policisë dhe Drejtoresha e Qendrës Zhvillimore në varësi të Shërbimit Social Shtetëror në krye të një grupi pune, mësynë në ambientet e “Prestige Resort” në Golem për t’i konfiskuar ato.
Edhe pse nuk ishte bërë asnjë njoftim më parë për këtë ndërhyrje, forcat e policisë kanë hapur me dhunë këtë të mërkurë ambientet e godinës së ‘Prestige Resort’, pa pritur vendimin e Gjykatës Administrative.
Përfaqësues të institucioneve janë futur brenda, teksa dyert i kanë hapur me kaçavidë dy djem të mbuluar me kapuç, që i përngjajnë grabitësve më shumë sesa punonjësve të shtetit, e që për më tepër kanë sulmuar edhe mediat.
Ndërkohë, forca të shumta policie janë vendosur në kordon tek dera që u hap me dhunë dhe nuk kanë lejuar përfaqësuesit ligjore të “Hysenbelliu Group” që të jenë të pranishëm në momentet që përfaqësuesit e Shërbimit Social Shtetëror pretendojnë se do realizojnë inventarin.
Policia gjithashtu nuk ka lejuar kamerat dhe gazetarët të afrohen për të filmuar dhe dëshmuar situatën e paprecedentë që po ndodh.
Lidhur me situatën e krijuar ka reaguar edhe deputeti i Partisë Demokratike, Edi Paloka, i cili e lidh “hakmarrjen” e Ramës me rezultatet e raportit të Departamentit Amerikan të Shtetit për qeverinë e tij, të cilën “e nxiu” me kritika mbi korrupsionin dhe shkeljen e lirisë së mediave.
Por, ndër të tjera Paloka ka një thirrje për ambasadoren amerikane në Tiranë, Yuri Kim, e cila vepron me “kodin e heshtjes” sa herë që i përkëdheluri i saj në krye të qeverisë ndërmerr veprime arbitrare në dëm të pronës private dhe bizneseve të ligjshme.
“O Yuri…o zonja ambasadore, përfaqësuese e DASH në Shqipëri, a ke ndonjë fjalë për të thënë?”, pyet Paloka, duke nënvizuar se “Rama me vullnet të plotë po sfidon ata”, të cilët ambasadorja pretendon se i përfaqëson.
Për Palokën, është e qartë se përse Kim “ka qepur gojën”, kjo pasi ajo nuk përfaqëson SHBA-të por interesat personale në raport me qeverinë e Ramës.
“Ti që edhe kur kollitej opozita, lëshoje rrufe ndaj saj, a ke ndonjë fjalë për Ramën sot? Po për raportin e DASH a ke ndonjë fjalë? Sigurisht që jo se ti këtu nuk përfaqëson SHBA, siç të pëlqen të thuash, ti përfaqëson ‘McGonigalët’ dhe detyrimet i ke ndaj tyre e ndaj korruptuesit të tyre. Misioni yt këtu është shkatërrimi i opozitës që të mbijetojë Rama edhe pse është i zhytur kokë e këmbë në korrupsion kundër interesave të vendit që ti përfaqëson”, shprehet deputeti i PD.
