YouTube njoftoi të premten se do të rivendosë kanalin e ish-presidentit Donald Trump. Kanë kaluar më shumë se dy vjet që kur llogaria e Trump u pezullua pas sulmit të 6 janarit 2021 në Kapitolin e SHBA. Ish-presidenti u përjashtua nga disa platforma të mediave sociale për postimet e tij gjatë kohës së kryengritjes, shkruajnë mediat e huaja.
“Duke filluar nga sot, kanali i Donald J. Trump nuk është më i kufizuar dhe mund të ngarkojë përmbajtje të reja. Ne vlerësuam me kujdes rrezikun e vazhdueshëm të dhunës në botën reale, duke balancuar mundësinë që votuesit të dëgjojnë në mënyrë të barabartë nga kandidatët kryesorë kombëtarë në prag të zgjedhje. Ky kanal do të vazhdojë të jetë subjekt i politikave tona, ashtu si çdo kanal tjetër në YouTube”, thuhet në një deklaratë të YouTube.
Llogaria e tij kishte mbledhur mbi 2.6 milionë abonentë. Në muajt e fundit, Trump është lejuar gjithashtu të kthehet në Twitter, Facebook dhe Instagram. Rivendosja e Trump në platformat e mediave sociale i jep atij një audiencë më të gjerë ndërsa ai rrit fushatën e tij të vitit 2024, megjithëse ai ende nuk ka postuar në ato faqe që kur u hoqën pezullimet.
