Niveli alarmant i shpopullimit të Shqipërisë kanë “detyruar” kryeministrin Edi Rama që të zhvillojë një takim me sipërmarrësit në vendin tonë. Duke hequr përgjegjësinë e tij për keqqeverisjen dhe korrupsionin galopand me tenderrat abuzivë të denoncuar çdo ditë nga opozita, Rama ditën e sotme pa “pikë turpi” u tha përfaqësues të bizneseve se ata janë fajtorë për largimin e shqiptarëve në emigrim.
Sipas Ramës, bizneset në vendin tonë po i bëjnë “gropën” vetes, pasi për fajin e tyre, në vendin tonë mungon fuqia punëtore.
“Vendosëm të bëjmë këtë takim për një proces që dëshirojmë ta kthejmë në një dialog kombëtar me sipërmarrjen por edhe aktorët e tjerë dhe të gjithë shoqërinë sepse jemi në një udhëkryq shumë delikat dhe më në fund vetë sipërmarrja po e shikon gropën që i ka hapur vetes vit pas viti duke bërë atë që bëri ai që tha në fund, sapo e mësova gomarin pa ngrënë më ngordhi. Tani sipërmarrja po shikon që lufta për ruajtjen e burimeve njerëzore i ka hyrë brenda në territorin e vet. Tani po shikon se si po i ikin nga duart pikërisht ato forca pa të cilat sipërmarrja vdes, njerëzit. Tani të gjithë po e shohin se si shtetet më të zhvilluara janë futur me kokë për të zhvatur nga të munden burimet njerëzore të kujt munden. Nëse një punonjës apo një i ri ka mundësinë dhe perspektivën të paktën teorike që duke u larguar ta gjejë punën diku tjetër, sipërmarrja nuk ka ku shkon. Tani dilema e sipërmarrjes është të rrojë apo të vdesin”, tha Rama.
Gjithashtu Rama u përgjigjet zërave kritik të opozitës e cila ka artikuluar se rritja e rrogës minimale në vendin tonë po kryhet për qëllime elektorale. Rama gjithashtu e pranoi informalitetin e lartë në tregun e punës madje edhe pagesat informale me “zarfe” kryesisht në sektorin e ndërtimit.
“Rritja e pagës minimale sot 40 mijë leke u diktua nga kjo. Nuk e kishim programuar pagën minimale. Shumë njerëz komentojnë që thonë duhet të jetë 800-900, duhet të jetë 1200. Problemi nuk është dëshira, kapaciteti që ka tregu dhe ekonomia për ta mbajtur. Paga minimale ka një logjikë por nga ana tjetër s’mund të vazhdonim me programin që nuk ishte parashikuar. Lufta në Ukrainë ka një lidhje shumë të madhe. Në këto kushte s’mund të mos reagonim. 38 mijë lekë ka qenë maksimumi i programeve elektorale. Në prill bëhet 40 mijë lekë. Kjo s’ka lidhje me fushatat. S’kemi pse të rrisim pagat për të fituar zgjedhjet. Njerëzit na besojnë më shumë se ç’besojnë të tjerët. Paga minimale është rritur se është koha për ti dhënë të gjithë bashkë një shtysë. Pagat reale në Shqipëri janë më të larta se ato të deklaruara”, tha Rama.
