Komisioni i Ankesave dhe Sanksioneve rrëzoi sot vendimin e Ilirjan Celibashit, duke i kërkuar KQZ-së që të regjistrojë PD-në e Enkelejd Alibeajt si subjekt zgjedhor për procesin e zgjedhjes së drejtuesve vendorë më 14 Maj.
Ky lajm duket se nuk ka ndikuar aspak te fushata e prezantimit të kandidatëve nga ana e kryedemokratit Sali Berisha, i cili u ndal mbrëmjen e sotme në Lushnje, ku prezantoi Eduart Sharkën si kandidat i koaliconit “Bashkë Fitojmë”.
Gjatë prezantimit të Sharkës, Berisha u ndal gjatë te fraksioni “Alibeaj” duke akuzuar kryetarin e tyre në detyrë, por edhe autorizuesin që KQZ e njeh ende si kryetar të PD, Lulzim Basha, se janë pengje të Edi Ramës.
Sipas kreut të opozitës, Basha dhe Alibeaj shantazhohen dhe veprojnë duke çuar ujë në mullirin e Ramës, pasi kryeministri përdor dosjet që ka kundër tyre. Një ndër këto dosje është ajo e lobimit rus në PD, që sipas Berishës ka lidhje vetëm me “Lulzim Bravën”, i cili është përgjegjës për shifrën 700 mijë euro.
Berisha tha se Lulzim Basha “u kap” nga Edi Rama përmes dosjes në fjalë, e cila e rrezikonte Bashën me 6 vite burg.
“Futjen në xhep” përmes një dosje sipas Berishës, Rama po e aplikon edhe me Alibeajn në mënyrë që të dëmtojë kandidatët e dalë nga “Primaret” dhe që garojnë për opozitën e bashkuar. Ai theksoi se Alibeajt “po i vjen dita” pasi ka fakte edhe kundër tij.
“A mbahet kryeministër një njeri që jo vetëm blen në 4 anët cilin të mundet në vend, por blen kryezbuluesin e SHBA-ve si vrasës me pagesë ndaj opozitës. Unë i them këtij faqeziu se historia nuk do ta falë kurrë këtë akt. U bë famëzi para botës. Dje i thoshte gazetës më të madhe në Europës se po e bëjnë kokë turku, ti nuk po shkon si kokë turku por si tradhtar i pabesë dhe njeri që korrupton. Ke shkelur çdo kod dhe duhet të përfundosh si McGonigal-i.
Kjo fushatë ka një specifikë, ne hyjmë në këtë fushatë totalisht duke na konfiskuar ato që meritojmë dhe që na njeh kushtetuta. Rama konfiskoi logon e partisë. Lidhjet e tyre janë lidhje krimi. Lidhjet e krimit janë më të tmerrshmet, të tilla janë ato të Ramës me Lul bravën dhe Alibashën.
Atë e ka kapur me dosjen e larjes së parave dhe i tha se je 6 vite në burg sepse janë 700 mijë euro. Auditet kontrolluan, nesër bëj publik raportin. Përveç 25 mijë eurove nga kontot e PD-së, 700 mijë eurot s’kanë lidhje me PD-në, janë përgjegjësi e Lulzim Bravës. Edi Rama me këtë e futi në xhep. Ai tjetri që noton mes dy Taulantëve ka problemet e veta, por do vijmë dhe aty”, tha Berisha.
Ndër të tjera Berisha nënvizoi se zgjedhjet e 14 majit janë të një rëndësie politike të jashtëzakonshme për vendosjen e pluralizmit.
“Po nuk e vendosëm çatia e këtij vendi do na zërë të gjithëve. Ndaj dhe ne të bashkuar duhet të bëjmë gjithçka për të shndërruar 14 majin në ditën e kthesës së historisë”, nënvizoi ai.
