Ka përfunduar mbledhja e Grupit të Partisë Socialiste në selinë rozë. Takimi i nisur prej orës 18:00 kishte në fokus përgatitjen për zgjedhjet vendore të 14 majit.
Bëhet me dije se drejtuesit e qarqeve kanë raportuar për sondazhet për kandidatët për kryebashkiakë dhe këshilltarët. Kryeministri Edi Rama ka dhënë porosi deputetëve që të angazhohen në zonat e tyre elektorale për zgjedhje. Ndërkohë, nesër pasdite në orën 17:00 Rama do mbledhë Kryesinë e PS.
Po ashtu, numri një i qeverisë ka porositur që aplikacioni “Aktivisti” të vazhdojë të përdoret nga të gjithë, në mënyrë që të ketë angazhim maksimal për zgjedhjet që pritet të mbahen për më pak se 2 muaj.
Kryetari i Partisë Demokratike, Sali Berisha ka denoncuar se kryeministri Edi Rama së fundmi ka shpikur një aplikacion që mat “Like”-et dhe “Komentet” e punonjësve të adminsitratës duke i detyruar ata që të jenë aktiv në rrjetet sociale.
Sipas Berishës, Rama kërcënon se do të shkarkojë nga puna këdo punonjës të administratës që nuk pëlqen dhe nuk komenton postimet e qeverisë në rrjetet sociale.
Gjithashtu Berisha i ka bërë thirrje presidentit të Facebook-ut, Mark Zuckenbergut që të mos lejojë këtë abuzim të kryeministrit shqiptar.
Opozita vazhdimisht ka artikuluar se Edi Ramën vjedh votave dhe manipulon rezultatin, madje sipas Berishës, kreu i qeverisë ka arritur që të “blinte” dhe ta asgjësonte edhe opozitën fiktive të Lulzim Bashës.
