“Këta që hanë kokën e njëri-tjetrit, ta dish që sa herë hanë kokën e njëri-tjetrin, nuk ndjej asgjë tjetër veçse një frymëmarrje të thellë, dhe them hënkshin kokat e njëri-tjetrit. Marr frymë thellë… Le të vrasin njëri-tjetrin, janë të lutur ta bëjnë”.
Këto ishin disa rreshta të thënë në zhargonin popullor nga kryeministri Edi Rama në studion e një emisioni televiziv në nëntor të 2018, kur gazetarët e vendosën para përgjegjësisë për numrin e lartë të vrasjeve në Shqipëri.
Asnjë plan masash për të parandaluar përplasjet me armë me bandave dhe marrjen e jetëve të të pafajshmëve nuk u mor nga qeveria prej asaj kohe, ndërsa në radhët e Policisë së Shtetit, shifra e efektivëve të arrestuar për lidhje me krimin dhe bandat e drogës veçse shtohet çdo vit.
Në një kohë kur kanë kaluar rreth 5 vite nga ajo deklaratë e Ramës, në një lokal në Tiranë u vra një 58-vjeçare e pafajshme nga hakmarrja e bandave të krimit të organizuar me njëra-tjetrën dhe 5 qytetarë të tjerë morën plumba duke përfunduar te “Trauma”.
Duke reflektuar mbi ngjarjen në fjalë, ish-kryeministri Sali Berisha e interpreton shprehjen “le të hanë kokat” të Ramës si një sinjal për bandat, të cilave iu komunikua se shteti nuk ka dënimin me vdekje, ndaj le të dalin të “ekzekutojnë rrugëve”.
Sipas kryedemokratit kjo ishte mënyra e Ramës për t’u dhënë “licenca për të vrarë” grupeve kriminale, me produktin final që është ngjarja në Don Bosko, ku u mor një jetë e pafajshme.
“Ky regjim mbështetet te krimi, paguajmë një polici që është e infiltruar nga krimi. Raporti i inteligjencës tregonte se 127 komisarë ishin marrë me mbjellje droge. Edi Rama doli me parimin, t’i hanë kokën njëri-tjetrit. Ne jemi vend pa dënim me vdekje dhe duhet të krenohemi. Çfarë do të thotë kjo, shteti nuk ekzekuton ndaj dilni ju dhe ekzekutoni rrugëve, ai u thotë kriminelëve rendi është në duart tuaja, nuk kamë punë unë. Nëse thotë ashtu ai jep licenca për vrasës, çfarë ndodhi parmbrëmë.
Një nënë që punonte për të mbajtur mbesën e vetë me dy punë, 4-5 qytetarë të tjerë, u bënë objekt i breshërive të palidhur me asnjë krim, për fajin e vetëm se Edi Rama autorizon vrasësit t’i hanë kokën njëri-tjetrit dhe ata arrijnë deri sa të qëllojnë pa nishan, mund të kishim 6 të vdekur, kjo është politika e tij”, deklaroi Berisha.
