Komisioni Qendror i Zgjedhjeve ka refuzuar kërkesën e “Lëvizja Bashkë” për regjistrimin si subjekt politik në zgjedhjet lokale të 14 majit, duke i mbyllur derën kështu një beteje të trefishtë për bashkinë e Tiranës në zgjedhjet lokale të 14 majit.
Me vendimin e sotëm drejtuesi i “Lëvizja Bashkë”, Arlind Qorri, nuk do të mund të kandidojë në garën, që pritet të jetë një betejë “kokë më kokë” mes Erion Veliajt dhe Beind Këlliçit.
Në fjalën e tij për mediat pas vendimit, Qorri i cilësoi argumentet e dhëna nga Kryekomisioneri Shtetëror i Zgjedhjeve, Ilirjan Celibashi, të papranueshme dhe skandaloze.
“Mendoj që argumenti që dha Kryekomisioneri Shtetëror i Zgjedhjeve është i papraueshëm, i paligjshëm. Ata kërkojnë, jo vendimin e gjykatës që kemi dërguar në datën 6, kërkojnë vendimin e formës së prerë që formalisht do dalë në datën 17. Kjo në gjykimin tonë është e paligjshme, sepse askund Kodi Zgjedhor thotë që vendimi duhet të jetë i formës së prerë. Arsyeja se pse ne nuk e kemi vendimin e formës së prerë, nuk është për fajin tonë, por për fajin e Gjykatës së Tiranës, e ka vonuar mbi 20 ditë vendimin”, u shpreh Qorri.
Por, edhe pse KQZ i refuzoi kërkesën, duket se “Lëvizja Bashkë” nuk do të dorëzohet pasi Qorri tha se vendimi do të apelohet në KAS ose Kolegjin Zgjedhor.
Ai gjithashtu shtoi se anëtarët e kësaj lëvizje do të vijojnë me mbledhjen e firmave që ai të kandidojë si i pavarur për Bashkinë e Tiranës.
“Ne do të jemi në zgjedhjet e 14 majit, sepse siç ju thashë ka akoma faza të apelimit të këtij vendimi skandaloz. Ne kemi një farë shprese se ose KAS-i ose Kolegji Zgjedhor do jetë minimalisht i arsyeshëm dhe minimalisht në respekt të gërmës dhefrymës së ligjit sa për të regjistruar “Lëvizja Bashkë”.
Ne vazhdojmë mbledhim firma, u bëjmë thirrje qytetarëve të vijnë të firmosin për “Lëvizja Bashkë” dhe kandidimin tim për Bashkinë e Tiranës”, theksoi ai.
