Nga Boldnews.al
Kryetari i Komisionit Qendror të Zgjedhjeve, Ilirjan Celibashi, i dha 48 orë kohë përfaqësuesve ligjorë të grupimit “Alibeaj” që të plotësojnë dokumentacionin dhe të qartësojnë çështjen e “Autorizimit” të lëshuar një vit më parë nga kryetari i dorëhequr i Partisë Demokratike, Lulzim Basha, para se të vendosë për regjistrimin e PD-së në zgjedhjet lokale të 14 Majit 2023.
Në seancën e zhvilluar paraditen e së Enjtes, KQZ dëgjoi argumentat e dy grupimeve të Partisë Demokratike, njëri i përfaqësuar nga Sali Berisha dhe tjetri nga Enkelejd Alibeaj, ku secili prej tyre kërkoi regjistrimin e Partisë Demokratike në zgjedhjet vendore.
Përfaqësuesi i kryetarit të Partisë Demokratike, Sali Berisha, kërkoi nga Celibashi që të pranonte kërkesën e tij, duke argumentuar se vendimi i gjyqtarit të Tiranës, Agron Zhukri, që njohu Grupin e Rithemelimit si drejtues të formacionit politik është ende në fuqi.
Në datën 3 Mars 2023, Gjykata e Apelit, në një vendim tepër të diskutueshëm, vendosi të shfuqizojë vendimin e Zhukrit, duke e rikthyer çështjen për shqyrtim në shkallë të parë.
Përfaqësuesi ligjor i Berishës në KQZ argumentoi se vendimi i Zhukrit është ende në fuqi dhe se vendimi i Gjykatës së Apelit nuk është zbardhur dhe është i pazbatueshëm.
Në këtë pikë ndërhyn Celibashi. Ai deklaroi se, sipas dokumentave të gjykatës, rezulton se kryetar i PD-së është Lulzim Basha.
Megjithatë, ai vuri në pikëpyetje “Autorizimin” e Lulzim Bashës, të lëshuar tre ditë para dorëheqjes së tij, të paraqitur në Mars 2022, i cili ngarkon Enkelejd Alibeajn që të përfaqësojë Partinë Demokratike për çështjet zgjedhore.
Celibashi i la 48 orë kohë përfaqësuesit të grupimit “Alibeaj” që të saktësojë çështjen e Autorizimit.
Por, çfarë do të thotë “afati 48 orë”. Nuk do të jetë aspak çudi që, brenda këtij afati, trupa gjykuese e Apelit të nxitet që, me shpejtësi, të zbardhë vendimin që shfuqizoi vendimmarrjen e Agron Zhukrit.
Dhe, në këtë mënyrë, grupimi “Alibeaj” do të marrë një lloj frymëmarrje proceduriale.
Megjithatë, pikëpyetja për grupin e pakicës brenda Partisë Demokratike vijon të mbetet e njëjta-ku do ta gjejë “Autorizimin” e Lulzim Bashës së dorëhequr?
Shqetësimi për “Autorizimin” u reflektua edhe tek përfaqësuesi ligjor i grupimit “Alibeaj”, i cili kërkoi zbardhjen e menjëhershme të vendimit të Celibashit, me qëllim që të ushtrojë të drejtën e ankimit pranë Komisionit të Ankimeve dhe Sanksioneve zgjedhore (KAS).
