Ish-ministri i Drejtësisë, Ylli Manjani ka reaguar pas një njoftimi të KLGJ-së, që i erdhi në mbrojtje trupës gjykuese të Apelit që dha vendimin për vulën e PD, disa ditë më parë.
Në një postim në rrjetet sociale, Manjani shkruan se, vendimi i Apelit për vulën, nuk rrëzoi vetëm besimin, por shembi krejt drejtësinë.
Ish-ministri shprehet se në vend që KLGJ të kërkojë ndjesë dhe të korrektojnë sjelljen e gjyqtarëve në raport me ligjin, kërkon hesap pse kritikohet gjykata.
Reagimi
Në postimin në FB, Manjani shkruan:
Jo mor jo!
Aludimet publike e dëmtokan besimin te drejtësia, ndërsa dhunimi i hapur i ligjit nga Gjykata e Apelit e cila pranon një ankim të një personi që nuk ishte palë në gjykim,e rregullon besimin te drejtësia!
Po mirë, le të themi se sqënka e kapur drejtësia,pse e dhunojnë ligjin, kushtetutën e demokracinë në vend ata për sport?!
Apo për qejf?!
Allah,allah…
Shikoni, në daç besojeni në daç jo, atë që ka bërë gjykata e apelit me rastin e vulës është rrëzim i gjithë drejtësisë jo thjesht i besimit tek ajo!
Është vendosje e saj nën hyqmin e pushtetit, kundër parimeve të shtetit.
Është vendosje e gjykatës kundër rendit demokratik në vend dhe qartësisht në dhunim masiv të të drejtës së gjysmës së votuesve për të votuar.
Kështu që KLGJ, le ta besojë vetë po të dojë këtë gjykatë e këtë drejtësi, se njeri tjetër ska shanc.
Ka kohë që Barometri dhe çdo matje tjetër tregojnë qartë se mbi 70% e shqiptarëve nuk besojnë se ka gjykatë të pavarur.
Oj, të kërkojnë edhe hesap pse kritikohet gjykata, në vend të kërkojnë ndjesë dhe të korrektojnë sjelljen e gjyqtarëve në raport me ligjin!!
Kulmi!
