Depozitimi i kërkesës së grupit “Alibeaj” në KQZ për t’u regjistruar në zgjedhjet lokale të 14 Majit, ka rikthyer Lulzim Bashën si kryetar të Partisë Demokratike, një vit pasi ai vetë doli publikisht dhe njoftoi dorëheqjen nga detyra.
Mund të duket e pabesueshme por në kërkesën që përfaqësuesi ligjor i këtij grupimi, Indrit Sefa, Basha rezulton të jetë ende ligjërisht në drejtimin e PD-së.
Pjesë e dosjes janë edhe dy dokumente, një i lëshuar nga Gjykata e Tiranës në 1 mars 2023, e cila vërteton që Basha është ligjërisht kryetar i PD-së dhe një tjetër ku ai në cilësinë e detyrës që mban autorizon nënkryetarin Enkelejd Alibeaj dhe sekretarin e përgjithshëm, Gazmend Bardhi të përfaqësojnë këtë forcë politike.
“Unë Lulzim Basha, me funksion kryetar i Partisë Demokratike, lidhur me zgjedhjet vendore të 2023, sipas datës së caktuar nga Dekreti i Presidentit të Republikës, në përmbushje të kompetencave të kryetarit të Partisë, autorizoj ushtrimin e tyre nga nënkryetari i Partisë Enkelejd Alibeaj dhe/ose Sekretari i Përgjithshëm Gazmend Bardhi dhe/ose Sekretari për çështjet ligjore dhe zgjedhore Indrit Sefa…”, thuhet në letrën që është dërguar në KQZ.
Lidhur me këto dokumente që tregojnë Lulzim Bashën si kryetar, ka reaguar edhe kryetari i Këshillit Kombëtar të PD, Edi Paloka, duke nënvizuar se gjithçka është pjesë e planit të Edi Ramës për të përjashtuar opozitën e vërtetë nga zgjedhjet lokale të 14 majit.
“Alibashët paskan dërguar sot letra ne KQZ për te regjistruar grupimin e tyre . “Kryetar i partisë” ne letrat qe kane dërguar rezulton … “ i dorëhequri” prej një viti, vete L.B. Qe Kushtetuta , Kodi, ligji dhe gjithë procedurat ligjore do vazhdojnë te shkelen për te çuar deri ne fund qëllimin e Ramës , nuk ka asnjë dyshim”, shkruan Paloka.
Më tej, deputeti demokrat nënvizon se “Alibashët” pavarësisht turpit nuk do të ndalen në partneritetin e tyre me kryeministrin për të shkatërruar opozitën, por me një pyetje kërkon reagim nga deputetët e rreshtuar pranë Alibeajt për atë çka përmban dokumenti.
Kjo pasi për Palokën është absurde që deputetët të “qepin gojën” kur ishin ata vetë që kërkuan me ngulm dorëheqjen e Bashës dhe tashmë pas një viti ai ju “mbin” në letra sërish si kryetar i PD.
“Edhe qe Alibashët do legenosen deri ne fund për te realizuar shërbimin e paguar ndaj Ramës për shkatërrimin e opozitës, nuk ka me asnjë dyshim. Unë kisha vetëm një pyetje për ata deputete qe publikisht shpallen se nuk e njihnin me L.B si kryetar dhe “e detyruan “ te dorëhiqet, çfarë do te bëjnë tani , apo nderi dhe dinjiteti nuk kanë më asnjë vlerë?”, nënvizon Paloka.
