Vendimi i qeverisë për rritjen e pagës minimale në 400 mijë lekë të vjetra në muaj prej 1 prillit, nuk shihet si një zgjidhje për të nxjerrë ekonominë dhe shoqërinë shqiptare nga kriza, prej deputetes demokrate Jorida Tabaku.
Tabaku në një reagim të bërë në rrjetin social Facebook lidhur me këtë vendim, shprehet se kriza do të thellohet edhe më tepër për shtresën e mesme, e cila me këtë vendim do të mbitaksohet pasi do të paguajë 16 milionë euro shtesë në taksa.
Problemi kryesor sipas deputetes demokrate është fakti se këto16 milionë euro që qeveria do të përfitojë nga taksat, nuk do të shkojnë në investime të velfshme për të përmirësuar jetën e shqiptarëve por për koncesione korruptive e tenderë abuzivë.
“Mirëmëngjesi dhe javë të mbarë, 16 milionë euro shtesë do të paguajë shtresa e mesme vetëm si rezultat i rritjes së pagës minimale. Kjo, shtuar me 23% për të gjithë të vete punësuarit do të jetë një barrë shumë e rëndë për shtresën e mesme. Në vend që në Shqipëri të promovohet e të mbështetet puna dhe talenti, fatkeqësisht kjo nuk ndodh. Shtresa e mesme e cila duhet të ishte motori i zhvillimit të një vendi, sot është e mbitaksuar, e këto taksa që merren nga shtresa e mesme përkthehen në konçesione korruptive, të cilat në fund të ditës nuk i shkojnë pjesës më të madhe të shoqërisë”, nënvizon Tabaku.
Sipas Tabakut, Shqipëria vuan prej faktit se sistemi ynë ekonomik i dirigjuar në këtë mënyrë nga qeveria e penalizon punën e ndershme dhe talentin duke nxitur emigrimin masiv të profesionistëve të arsimuar në vend.
“Unë besoj që problemi është te sistemi, te sistemi i ngritur, i cili penalizon punën, i cili penalizon talentin e nuk e mbështet talentin. Kjo në fund të ditës përkthehet në një kapje shteti. Pa e ndihmuar dhe mbështetur shtresën e mesme ne nuk i themi dot stop emigracionit masiv”, nënvizon ajo.
