Kreu i Partisë Demokratike, Sali Berisha sapo ka lënë zyrën në selinë blu dhe i është bashkuar protestuesve.
Lideri demokrat i rrethuar nga simpatizantë të shumtë të Partisë Demokratike ka marshuar në këmbë nga selia e PD drejt Kryeministrisë aty ku është ngritur podiumi në të cilin do të flasin liderët e opozitës. Gjithashtu në të njëtën kohë edhe Ilir Meta ka lënë selinë e Partisë së Lirisë dhe i është bashkuar protestës.
Qytetarë nga i gjithë vendi, janë nisur drejt Tiranës, për tju bashkuar protestës së thirrur nga opozita mesditën e sotme në bulevardin ‘Dëshmorët e Kombit’.
Njëkohësisht masat e sigurisë janë shtuar edhe në Gjykatën e Apelit për të shmangur ndonjë incident të mundshëm pas vendimit të sotëm për “vulën” e Partisë Demokratike.
Skena ku do të mbahen fjalimet e liderëve të opozitës sot po bëhet gati, edhe kryeministria ishte në përfundim të masave para fillimit të protestës. Institucioni ishte blinduar, fortifikimi i dyerve kishte përfunduar, ndërsa dritaret ishin kryesisht me grila mbyllur.
Ditën e sotme paralelisht në Gjykatën e Apelit do të jepet vendimi se kush do ta drejtojë Partinë Demokratike.
