Aksidenti masiv mund të kishte pasoja tragjike në Tiranë në zonën e njohur si “Shallvaret”.
Autobusi i linjës së unazës së vogël ka marrë përpara me dhjetëra automjete, nga fuoristrada te makinat e vogla, duke shkaktuar panik dhe lënë dhjetëra persona të plagosur. Njerëzit janë në rrugë, duke u dhënë ujë të plagosurve dhe duke u përpjekur t’i qetësojnë.
- Përse gënjeu policia?
Fillimisht Policia e Tiranës ka dalë me një njoftim zyrtar lidhur me aksidentin që ndodhi mesditën e sotme në kryeqytet, ku urbani i Unazës është aksidentuar me disa automjete. Lidhur me ngjarjen e rëndë blutë bëjnë me dije se janë plagosur vetëm 3 persona, ndërsa me të mbërritur në vendin e ngjarjes mediat bëjnë me dije se dhjetëra qytetarë janë lënduar dhe transportuar në spital me disa ambulanca. Kjo nuk është hera e parë që gënjen policia dhe mundohet që të fshehë ngjarjen pasi pronari i kësaj kompanie është Nadir Çausholli, i cili njihet si mik i ngushtë i kryebashkiakut Erion Veliajt.
“Më datë 27.02.2023, rreth orës 11:35, në vendin e quajtur Ura e Tajvanit, një autobus i linjës së Unazës është përplasur me disa automjete. Si pasojë janë dëmtuar 3 shtetas të cilët ndodhen nën kujdesin e mjekëve. Në vendngjarje ndodhen shërbimet e ambulancës me stafin mjekësor dhe shërbimet e Policisë”, njoftoi fillimisht policia.
Gazetarja e “Boldnews.al” nga vendi i ngjarjes raporton një kaos të vërtetë pasi janë mbi 10 makina të përfshira në këtë aksident të frikshëm kurse dhjetëra qytetarë janë plagosur. Mes të plagosurve ka burra, gra, të moshuar, madje edhe fëmijë që ishin duke udhëtuar me autobusin e unazës. Ambulancat njëra pas tjetrës kanë marrë disa të plagosur. Pamjet e rënda nga vendi i ngjarjes:
- Kopania e autobusit që u përfshi në aksident në pronësi të Nadir Çausholli
Kompania që është përfshirë në këtë aksident është në pronësi të Nadir Çausholli, i cili ka fituar edhe një lloj primati në biznesin e transportit urban të kryeqytetit, falë mbështetjes së kryebashkiakut të Tiranës, Erion Veliaj.
Nadir Çausholli u arrestua më 31 tetor të vitit 2015, pasi nga hetimet e Prokurorisë së Tiranës dhe Drejtorisë së Tatimeve, rezultoi se nëpërmjet kompanisë së tij “Omega farma” ka arritur të përfitoi me anë të “Falsifikimit të dokumenteve” dhe “mashtrimit” me pasoja të rënda, rreth 2.2 milionë euro nga fondi i ilaçeve të rimbursueshme.
Nga ilaçet tek autobusët, kush është Nadir Çausholli?
Në fund të vitit 2021, kompania “CFO Pharma” blen për 100 mijë euro aksionet e shoqërisë “Gerard-A”, e cila zotëronte licensën e linjës së autobusëve urbanë të Kasharit.
Pronarët e kompanisë së mëparshme kishin vështirësi financiare, duke akumuluar një borxh prej rreth 2 milionë euro. Çausholli bleu kompaninë e linjës së autobusëve për 100 mijë euro, ndërkohë që mori përsipër edhe shlyerjen e borxhit 2 milionë euro që “Gerard-A” u kishte bankave të nivelit të dytë. Në vitin 2020, kur ishte dorëzuar Bilanci Tregtar, kompania “CFO Pharma” rezultonte me një fitim prej 3 milionë euro.
Nadir Çausholli vendosi të shpenzojë pjesën më të madhe të fitimit për blerjen e kompanisë së autobusëve e, bashkë me të, edhe licensën për linjën urbane të Kasharit.
