Në garën për bashkinë e Tiranës më 14 Maj, përballë Erion Veliajt, rivali i tij nga PD, Belind Këlliçi nuk do të jetë kandidati i vetëm.
Një emër i tretë do t’i bashkohet garës për bashkinë më të madhe në vend, me profesorin e Shkencave Sociale dhe njëherësh drejtuesin e Lëvizjes “BASHKË”, Arlind Qorri që kërkon gjithashtu të jetë në fletën e votimit të banorëve të kryeqytetit, pavarësisht se Gjykata e Tiranës ende nuk i ka dhënë statusin juridik që e njeh si parti.
Qori e njoftoi shndërrimin e ‘Organizatës Politike’ në partinë Lëvizja “BASHKË” vetëm pak javë më parë, duke iu future kështu kështu politikës pas një aktivizmi gati 12-vjeçar, ndërsa sot nëpërmjet një njoftimi në Facebook njoftohet kandidatura e aktivistit për kryebashkiak.
Qori u shpreh për ‘Lëvizja Bashkë’ se do të jetë zëri i të gjitha shtresave, me qëllimin final të mirën e përbashkët, në momentin kur e prezantoi në media.
“Shpresoj që ne të mos jemi partia e 155 e radhës e një pafundësie që nuk përfaqësojnë asgjë veç kryetarëve të tyre. Nuk vijmë nga hiçi, kemi 12 vjet aktivizëm me ‘Organizatën politike’, që është transformuar në ‘Lëvizjen Bashkë’. Kemi idetë tona, kemi dhënë edhe prova se u qëndrojmë fjalëve, në të gjitha protestat për minatorët, studentët, pensionistët, ata e dinë që jemi gati për çdo sakrificë për të mirën e përbashkët”, tha ai.
Edhe pse është shpallur kandidatura e Qorrit, Lëvizja “BASHKË” ende rrezikon të mos regjistrohet në zgjedhje pasi afati që ka vendosur Komisioni Qendror i Zgjedhjeve (KQZ) për regjistrim tëë subjekteve zgjedhore, është data 9 mars.
Edhe pse kanë dorëzuar dokumentacionin e nevojshëm pranë Gjykatës së Tiranës në datën 9 janar partia e krijuar nga Qorri ende nuk gëzon statusin juridik, ndërsa më 7 mars pritet që të zhvillohet një seancë gjyqësore për ta shpallur vendimin që do merret kundrejt tyre.
