Prej disa javësh, Policia e Shtetit ka ndërmarrë një operacion për çmontimin e kamerave nëpër vende publike, të vendosura nga persona të botës së krimit.
Eksperti i kriminalistikës, Ervin Karamuço dha më shumë detaje. I ftuar në emisionin “Zonë e Lirë” eksperti theksoi se kamerat janë të teknologjisë së lartë që arrijnë të fiksojnë deri në 2 km distancë.
“Kamerat janë syri i botës së krimit për të na parë të gjithë ne. Edhe policia ka kamera por jo në atë shtrirje gjeografike sa krimi i organizuar. Hoqëm kamerat por pas tyre janë serverat, monitorët, vëzhduesit dhe organizatorët. Për shumicën nuk ka ende të dhëna se ku janë serverat.
Për disa është dyshuar dhe për disa janë bërë kallëzime. Për shumicën e këtyre kamerave nuk ka ende sot lidhje se ku janë serverat, ku është monitori, sallat operative. Kamerat janë me ëireless dhe me panel diellor. Një kamer që vura re është Wise, të kap dhe të fikson deri në 2 km.
Kam dyshime të forta se disa prej këtyre kamerave, krimi i organizuar edhe për shkak të portofolit që ka, kanë një database që të bën jo vetëm fiksimin e fytyrës por edhe njohjen e fytyrës.”, tha ai.
Kush i ka përdorur këto kamera?
“Fakti që këto u hoqën dhe disa prej personave janë ende në kërkim dhe janë dënuar për krime të rënda, tregon se kanë pasur për qëllim kryesor jo vetëm mbrojtjen e tyre por edhe për të parë rivalët e tjerë. E dimë që nëpërmjet këtyre kamerave të vendosura në vende publike janë bërë vrasje. Nuk ka pasur vëzhgues por nëpërmjet kamerës janë urdhëruar ekzekutorët. Ka shumë kamera të pahequra“, theksoi Karamuço.
Karamuço, bëri publike se nga janari në Tiranë janë vendosur disa kamera të Policisë së Shtetit.
Ai nuk e caktoi zonën ku janë instaluar, por la të kuptohet se syri i policisë është shpërndarë në kryeqytet.
“Kini kujdes! Nga janari të keni shumë kujdes, sidomos në Tiranë. Janë vendosur kamera të Policisë së Shtetit dhe i monitoron vetë Policia e Shtetit”, tha ai.
Ndërkohë eksperti i sigurisë, Ilir Kulla tha se ka ardhur koha që Shqipëria të ketë një polici digjitale. Ai shtoi se kjo gjë kërkon investime të mëdha, ndaj Shqipëria përballë këtyre sfidave të reja duhet të investojë në këtë drejtim.
“Ka ardhur koha që në Shqipëri të kemi një polici digjitale. Kush do menaxhojë qendrat, kush do trajnojë njerëzit. Kjo punë kushton. Ne çalojmë me sistemet e integruara”, tha ai.
