Tre persona kanë mbetur të plagosur pasditen e sotme në dy ngjarje të ndodhur në Tiranë dhe Librazhd.
Në Librazhd, është qëlluar me armë zjarri një 35-vjeçar, i cili raportohet se ndodhet jashtë rrezikut për jetën. Autori është identifikuar dhe shpallur në kërkim, ndërsa motivi i plagosjes mbetet ende i paqartë.
Plagosja në Librazhd
“Shërbimet e Komisariatit të Policisë rreth orës 19:00, kanë marrë njoftim se në lagjen nr 1, një shtetas ka plagosur me armë zjarri një shtetas tjetër Menjëherë shërbimet e Policisë kanë shkuar në vendngjarje dhe kanë bërë të mundur identifikimin e autorit të dyshuar, Albi Biçaku, 27 vjeç, banues në Librazhd, dhe janë vënë në ndjekje të tij. Albi Biçaku, duke qarkulluar me një automjet, në rrethana ende të paqarta ka plagosur me armë zjarri shtetasin Shpëtim Skura, 35 vjeç”, njoftoi policia.
35-vjeçari është transportuar në spital për ndihmë mjekësore dhe aktualisht ndodhet jashtë rrezikut për jetën, shtuan të njëjtat burime, ndërsa grupi hetimor nën drejtimin e Prokurorisë vijon veprimet në vendngjarje me qëllim zbardhjen dhe dokumentin e plotë të rrethanave të ngjarjes.
Ndërkaq, burime policore thonë se i plagosuri ka qenë në një lokal, në tavolinë me shokun e tij të punës, me të cilin kishin pak që ishin kthyer nga Durrësi. Autori ndërkohë, sipas të njëjtave burime, ka ardhur dhe është larguar me një automjet tip “Audi”. Ai dyshohet se ka qëlluar një herë me pistoletë, duke plagosur 35-vjeçarin.
Burime kofidenciale pranë policisë lokale e përshkruajnë Albi Biçakun si “person problematik”.
Plagosja në Tiranë
Ndërsa në periferi të Tiranës, dy vëllezër janë janë qëlluar në vazhdën e një konflikti me një person tjetër.
Ngjarja ndodhi rreth orës 19:00, në rrugën “Dine Hoxha”, në afërsi të kthesës së Paskuqanit.
Policia njoftoi se gjatë një konflikti, Tedi Durishti, 30 vjeç, dyshohet se ka goditur me mjet prerës shtetasit J.P., 35 vjeç, dhe Xh. P., 31 vjeç, të cilët si pasojë janë dëmtuar dhe po marrin ndihmën mjekësore në spital.
Grupi hetimor po punon për sqarimin e rrethanave të ngjarjes si dhe kapjen e autorit të dyshuar, shtuan të njëjtat burime.
Lexo edhe:
