Policia e Kosovës ka njoftuar se disa persona kanë marrë me forcë në makinë një burrë në rrugën “Hamzë Jashari” në Prishtinë.
Sipas bluve, viktima ka arritur që të ikë nga vetura e të dyshuarve.
Policia ka bërë me dije se është identifikuar makina dhe njëri nga të dyshuarit është arrestuar.
“Fillimisht është raportuar se disa të dyshuar me një veturë me targa vendore, me forcë e kanë marrë viktimën mashkull kosovar dhe kanë ikur në drejtim të panjohur. Më pas viktima ka arritur që të ikë nga vetura e të dyshuarve. Sipas viktimës, të dyshuarit nën kanosjen e armës e kanë futur në veturë, viktimës i është ofruar tretman mjekësor.
Është identifikuar vetura dhe njëri nga të dyshuarit mashkull kosovar i cili është arrestuar, në vendbanimin e të dyshuarit është gjetur dhe sekuestruar një revole me një karikator. Me vendim të prokurorit i dyshuari është dërguar në mbajtje. Rasti vazhdon të hetohet”, thuhet në raportin e policisë.
