Një oficer policie, i identifikuar si Gjergji Riza, ka dhunuar një qytetar duke e goditur në ambjentet e brendshme të një pallati. Ngjarja e rëndë mësohet se ka ndodhur në qytetin e Pogradecit për arsye ende të panjohura. Sipas burimeve, video tronditëse është filmuar më datën 8 shkurt të këtij viti, por Policia e Shtetit është kujdesur që ta mbajë të fshehtë këtë ngjarje. Dhe nuk është hera e parë që policia e drejtuar nga Muhamet Rrumbullaku fsheh ngjarje të rënda.
Oficeri i policisë është filmuar teksa dhunon në mënyrë çnjerëzore të riun me iniciale K.N. Skena e dhunës është filmuar nga kamerat e një banese. Siç duket dhe në pamje, Riza për arsye që ende nuk dihen, ka goditur të riun me grushte. I riu nuk ka tentuar ta sulmojë oficerin e policisë i cili shihet gjatë gjithë videos duke goditur personin që e mban nga duart.
Nga ana e policisë nuk jepen të dhëna mbi rastin.
Sipas informacioneve kofidenciale, bëhet me dije se Drejtoria e Përgjithshme e Policisë së Shteti ka pezulluar fillimisht oficerin i cili punonte më parë në Pogradec, ndërsa tashmë është në drejtorinë vendore të policisë të Korçës. Oficeri i policise, i cili shfaqet ne pamje sipas te dhenave prej disa kohesh ka shfaqur probleme me kujtesen. Për shkak te gjendjes shendetesore ai eshte transferuar nga komisariati i Pogradecit ne drejtorine e Korçes.
Por a mjafton një masë e tillë nga kreu i Policisë së Shtetit, Muhamet Rrumbullaku për një ngjarje kaq të rëndë e skandaloze sa kjo që shfaqet në videon më poshtë. Kjo dhunë çnjerëzore duket se e ka burimin e frymëzimin tek shefat dhe drejtorët të cilët shkelin haptaz ligjin duke arrestuar e dhunuar persona që nuk kanë kryer asnjë krim. Dhe raste të tilla nuk janë pak. Por nisin në Tiranë e shtrihen në të gjitha rrethet e Shqipërisë, ku Policia e Shtetit duket se po shëndrrohet në një “bandë kriminale”, jo vetëm duke mos zbatuar ligjin por duke dhunuar me zë e figurë të drejtat themelore të qytetarëve.
Kjo duket se është fytyra e policisë së Rrumbullakut, i cili edhe pse premtoi se do të bënte reformë të thellë në Policinë e Shtetit, deri tani ka promovuar vetëm miqtë e tij në pozicione drejtuese.
