Deputetja demokrate Albana Vokshi u shpreh këtë të Martë në një intervistë televizive se edhe vetë socialistët e shohin të ardhmen e PS-së pa Edi Ramën.
Lidhur me protestat e opozitës, Vokshi u shpreh se një ndër synimet është sensibilizimi i qytetarëve dhe ndërkombëtare për çështjen “Mcgonigal”.
“Në një vend ku do kishte demokraci funksionale, kryeministri do largohej. Ne do bëjmë protesta për të sensibilizuar qytetarët, ndërkombëtarët”, tha Vokshi.
“Kërkojmë nga qytetarët që të sensibilizohen më shumë se ky është kryeministër i shqiptarëve dhe ata nuk meritojnë një kryeministër dhe qeverisje të tillë. Buxheti ka para por ato i vjedh Rama dhe i çon me valixhe te Mcgonigal”, shtoi ajo.
“Rama është kryeministri më i korruptuar, duhet ti dorëzohej drejtësisë, Edi Rama duhet të ishte para drejtësisë. Po të uleni në tavolina me socialistët, të ardhmen e shohin pa Edi Ramën. Edhe socialistët vetë e kanë të qartë se Rama ka menduar për veten e vet dhe një grusht njerëzisht për ta mbajtur në pushtet”, u shpreh më tej.
Ajo tha se çdo qytetar duhet të protestojë sot.
Sipas Vokshit, SPAK është i vonuar që nuk po nis hetimet ndaj Ramës për çështjen “McGonigal”.
“SPAK në mënyrën më qesharak e absurde tha (në përgjigje të kallëzimit të Gazment Bardhit) se ju duhet të jepni aktpadinë zyrtare. Ndërkohë duke u futur në faqen zyrtare të Departamentit të Drejtësisë e gjen. Është një mënyrë për tu tallur. SPAK duhet ta kishte hapur, se pse e hapi më përpara (hetimin) për ish-kreun e PD për një artikull të Mother Jones. Rama e ka korruptuar me të gjitha format e korruptimit Mcgonigal”, u shpreh ajo.
“Edi Rama ka tre javë që është fshehur, sepse avokati i ka thënë të heshtë, sepse çdo gjë do t’i përdoret”, tha Vokshi.
E pyetur cila është ndryshimi mes protestave të Bashës dhe këtyre sot, Vokshi tha se “diferenca është se qytetarët e kanë të qartë se opozita nuk është e blerë”.
Ajo theksoi se në protestat e opozitës “s’do ketë dhunë”, por “do jenë një manifestim vlerash”.
Deputetja demokrate bëri me dije se nga demokratët po shqyrtojnë forma të tjera reagimi përveç protestave, duke mos përjashtuar as grevë.
Vendimin e socialistëve në komisionin e etikës që përjashtoi për 10 ditë tetë deputetë të PD-së nga parlamenti dhe komisionet parlamentare, Vokshi e quajti nul e të paligjshëm. “Një mjet tjetër i Ramës përmes Nikollës për ti mbyllur gojën opozitës”, tha ajo.
Vokshi po ashtu vuri në dukje mos reagimin e ndërkombëtarëve.
“Ka janë ndërkombëtarët?! S’ka folur njeri deri më sot. A jemi këtu për vlera demokratike?! Unë i bëj thirrje OSBE që të flasë. Se s’është Albana që u pengua dje me urdhër të Nikollës. Jo! Unë jam një përfaqësuese e popullit. Kjo do të thotë ti mbyllësh gojën opozitës. Ne përfaqësojnë në parlament gjithë qytetarët shqiptarë që Rama i ka braktisur, i ka degdisur”, tha ajo.
Deputetja shtoi po ashtu se grupi i PD është kompakt dhe mblidhet njëherë në dy ditë, apo edhe çdo ditë.
