Seanca e sotme plenare ishte më e shkurtër seç planifikohej dhe me tensione. Tensione që nisën që në hyrje të Kuvendit, me punonjësit e gardës që nuk lejuan hyrjen në parlament të deputetëve demokratë të përjashtuar javën e kaluar nga komisioni i etikës.
Jashtë Kuvendit ndërkohë, simpatizantë të opozitës iu bashkuan thirrjes së kryedemokratit Berisha për protestë.
Seanca nisi në mënyrë të pazakontë: Fill pas fjalës së kryeparlamentares Lindita Nikolla, energjia elektrike u ndërpre për disa minuta. Sipas zyrës së shtypit të Kuvendit “u dogj pajisja UPS, e cila shërben për balancimin e energjisë në sallën e seancave plenare”.
Me rikthimin e energjisë elektrike në Kuvend, nisi edhe përplasja mes deputetëve të mazhorancës dhe atyre të opozitës. Mazhoranca kërkoi përjashtimin e Berishës lidhur me deklaratat e këtij të fundit më herët, se Charles Mcgonigal ka bërë orgji me ministra të PS në klabe në Tiranë. Vetë Berisha tha se me këtë lëvizje, mazhoranca kërkon të heqë vëmendjen nga afera Rama-McGonigal.
Kryeparlamentarja Nikolli e ndërpreu dy herë seancën, njëherë pas bllokimit të foltores nga deputetë të PD-së dhe njëherë tjetër pasi deputeti Flamur Noka vijonte ti frynte një bilbili teksa deputetët socialistë flisnin.
Nikolla madje njoftoi përjashtimin e tij nga seanca plenare, megjithatë deputeti vijoi me të njëjtin veprim.
Në këto kushte, Nikolla hodhi në votim mbylljen e seancës dhe mori mbështetjen e kolegëve socialistë. Seanca u mbyll, me Nikollën që njoftoi se data e seanca së radhës do të bëhet e ditur në një moment të dytë.
Teksa seanca u ndërpre dy herë, kryetari i PD-së Sali Berisha mbajti fjalimet e tij përmes lidhjeve live në FB.
Me mbarimin e seancës plenare, Berisha iu bashkua për disa çaste protestuesve, ku mbajti edhe një fjalim. Ai paralajmëroi se protestat do jenë të vazhdueshme.
“Sot parlamenti shqiptar ju e patë vetë, u dominua totalisht nga fantazma e McGonigal të Edi Ramës. Ajo që Rama kishte planifikuar, kishte planifikuar në mënyrë që të shpëtonte vetë dhe disa deputete ishin ndjerë të lënduara se, pse unë kisha thënë ditën e premte pse ai kishte bërë orgjira me zyrtarë. Por unë çfarë u thashë? Unë u thashë se, ato janë një realitet dhe sigurisht hetimit do ti jepen. Por ato janë terciare. Kryesore është lidhja e dy tradhtarëve McGonigal, tradhtar i kombit të madh amerikan dhe Edi Rama, tradhtar i kombit shqiptar. Tani, çështja numër 1 e parlamentit padiskutim që është komisioni hetimor parlament për një problem që ka tronditur botën, Amerikën, Shqipërinë, NATO-n dhe mbarë botën e lirë. Është në përcaktimin tonë, vendosmërinë tonë, që ky parlament ose do të ju japë zgjidhje këtyre problemeve ose nuk do të mund të trajtojë çështje tjetër. Prania juaj këtu i detyroi të largohen nga parlamenti. Por herën tjetër, do të duhet tu marrin leje ju për tu larguar nga parlamenti. Ndaj ju them, më mirë zbatoni rregullat, ligjet, respektoni të drejtat e opozitës. Janë 750 mijë zgjedhës, të drejtat e të cilëve shtypen në parlament. Ne kurrë nuk do të tolerojmë këtë. Rroftë revolucioni, rroftë opozita, rrofshi ju”, tha Berisha mes të tjerash.
Me përfundimin e fjalës së Berishës, nisi edhe shpërndarja e protestuesve.
Më tej, Berisha iu drejtua selisë së PD, nga ku tha se, “kjo betejë do të vazhdojë, do të vazhdojë deri në fitoren e plotë të revolucionit demokratik, mbi monizmin e bazuar në krimin, drogën, e Edi Ramës”.
Nga ana tjetër, kreu i qeverisë Edi Rama nuk ishte sërish prezent në seancën plenare për herë të tretë radhazi. Ai zhvilloi një takim me një zyrtar gjerman, me të cilin mbajti dhe një konferencë për mediat. Po ashtu, teksa para parlamentit protestohej, Rama postoi një video në FB, ku shfaqej në ballkonin e Kryeministrisë duke ndezur qiri për viktimat e tërmetit në Turqi dhe Siri.
