Kreu i Partisë Demokratike, Sali Berisha u shpreh se protesta e së shtunës e thirrur nga opozita “është sipar i një revolucioni që duhet të largojë me çdo kusht Edi Ramën dhe organizatën e tij kriminale nga pushteti”.
“Kjo protestë ka patur pretekst aferën Rama-McGonigal, por ama kjo është një nga aferat që ka tronditur më shumë SHBA-në, vendet e lira dhe opinionin publik shqiptar. Kjo aferë ka disa dimensione. I pari, është dimensioni i tradhëtisë dhe i një thike pas shpine që Edi Rama i bën SHBA-së, duke i korruptuar, rekrutuar në një mënyrë të turpshme dhe mafioze, njeriun ndër më të rëndësishmit të sigurisë së tyre, vendeve të NATO-s dhe botës së lirë. Ky është një akt armiqësor ndaj një vendi që Shqipëria nuk mund ta bënte kurrë. Kjo është thikë që portretizon shqiptarin si njeriun e pabesë ndaj miqve dhe partnerëve të tij. Thikë e cila mund të përdorej vetëm kundër vendeve armiqësore, kurrë ndaj miqve”, tha Berisha në studion e “Debat” në A2 CNN,
“Nga ana tjetër, dimension tjetër i kësaj afere është dhe dëshmia e një karakteri jashtëzakonisht të rrezikshëm të mafies shtetërore shqiptare. Edi Rama përdor narkoeurot, pasuritë kombëtare për të blerë mbështetje dhe qëndrime. Ky nuk ngurron në përdorimin e të gjitha formave të korrupsionit ndaj personave me ndikim në qëndrimet ndaj Shqipërisë. Siguroj shqiptarët që McGonigal nuk është rast i izoluar. Unë kam informuar se si një kryetar delegacioni i vëzhgimit të zgjedhjeve në vitin 2001 mori trajsën me para nga Fatos Klosi. Kjo është traditë e një partie që korrupton me të gjitha format, duke përdorur çdo mjet pamoral dhe të paligjshëm”, shtoi kreu demokrat.
Sipas tij, dimensioni i tretë madhor i kësaj afere “është përpjekja e Edi Ramës për të asgjësuar opozitën shqiptare, duke përdorur si vrasës me pagesë njërin nga njerëzit më të fuqishëm. Me kontributin e McGonigal, Edi Rama ia doli që me hetimet e bëra në Shqipëri, me mbylljen e dosjes së Bashës, të marrë peng ish-kryetarin e Partisë Demokratike”.
