Kryetari i Partisë Demokratike, Sali Berisha ka deklaruar mbrëmjen e sotme se mes personave të cilët kanë shkarkuar aplikacionin e krijuar nga PS-ja “Aktiv1sti”, janë edhe 32 prokurorë dhe efektivë policie.
Në një intervistë për A2CNN, Berisha e ka quajtur një gjë të tillë, një përpjekje kriminale për të shndërruar administratës në një seksion të Partisë në pushtet.
“Pak para minutash me erdhi lista e pafundme e aktivistëve që kanë marrë aplikacionin “Aktiv1isti”. Cilido që lexon këtë listë konstaton se kemi të bëjmë me një përpjekje kriminale për të shndërruar administratën në një seksion të PS. Kjo listë ka 32 prokurorë, kjo është reforma e Sorosit, kjo listë ka me dhjetëra dhe qindra policë, kjo është policia e Edi Ramës. Ky duhet të largohet një orë e më parë dhe të dërgohet aty ku e ka vendit”, tha Berisha.
Skandali kap skandalin në Shqipëri dhe tashmë është radha e aplikacionit të famshëm “Aktiv1sti”, i cili është ndërtuar nga Partia Socialiste dhe ka për qëllim zyrtar promovimin e punës së ministrive si edhe ndërveprimin me aktivistët e saj.
Në fakt, sipas dëshmive të publikuara në media ky aplikacion përdoret për të detyruar punonjësit e administratës që të bëjnë “like” dhe “share” postimet e ministrave, kryeministrit dhe drejtorive të ndryshme në rrjetet sociale.
Të gjithë duhet të regjistrohen me detyrim dhe të bëjnë “like” dhe “share” postimet e krerëve të qeverisë duke fituar kështue dhe pikë, të cilat më pas bëjnë një renditje sipas përdoruesve.
Sëfundmi, po qarkullon lista me emrat dhe pikët e përdoruesve të këtij aplikacioni ku krahas piunonjësve të bashkive apo ministrive, spikasin shumë policë, punonjës të prokurorisë dhe gjykatave apo tatimeve dhe doganave.
