Kryetari i Partisë Demokratike, Sali Berisha, ka zhvilluar mbrëmjen e kësaj te premte një takim me kryetarë, sekretarë dhe grupet e punës së degëve të Tiranës.
Në fokus të këtij takimi ishte protesta e 11 shkurtit që pritet të mbahet para kryeministrisë.
Ai u shpreh se Rama nuk njeh asnjë kufi apo akt moral në përpjekjet e tij për të dëmtuar opozitën.
“Së pari ju përshëndes të gjithëve ju këtu dhe të gjithë anëtarët e PD të forumit rinor, të lidhjes së gruas demokratike, të gjithë mbështetësit dhe simpatizantët tanë në Tiranë. Duhet të ritheksoj edhe njëherë këtu para jush se ne përballemi me një armik të egër të votës së lirë të opozitës, demokracisë dhe pluralizmit. Kemi përballë një njeri i cili siç dëshmuan për çdo shqiptar zhvillimet e fundit, nuk njeh asnjë kufi, asnjë moral, asnjë normë në përpjekjet e tij për të shkatërruar opozitën shqiptare. Aktet e tij janë ndër aktet më kriminale. Ai që në vitin 2017 pasi futi në xhep mandatin e dytë u tha shqiptarëve se tani do u tregoj unë si do qeveris. Do qeveris pa opozitë. Një opozitë e cila kishte humbur zgjedhjet. Nuk mjaftonte kjo. Ajo nuk mund të tolerohej. Ajo duhet të shkatërrohej. Duhet të zhdukej dhe për të këtë qëllim duhet të angazhonte organizatën më të fuqishme të planetit, FBI-në. Duhet të korruptonte një nga dy tre njerëzit më të rëndësishëm të kësaj organizate për të manipuluar apo për të hetuar”, është shprehur Berisha.
