Kryetari i Partisë së Lirisë, Ilir Meta deklaroi publikisht këtë të Enjte se kryeministri Edi Rama ka përdorur “non grata-n” për të shantazhuar biznesmenë në Shqipëri.
Sipas Metës, Rama, me ndihmën e ish-zyrtarit të lartë të FBI-së në Nju Jork Charles McGonigal, ka ngritur një skemë zhvatjeje dhe shantazhi.
“Janë shumë biznesmenë që janë gjobitur nga banda e Edi Ramës. U vinin gjoba biznesmenëve. Non grata u shndërrua nga Edi Rama dhe banda e Ramës në biznesin e dytë më të rëndësishëm në Shqipëri pas trafikut të drogës”, theksoi Meta në emisionin “Frontline” në News 24. “Po të hetojë drejtësia me seriozitet, gjë që është e pamundur se kjo është krijesë e Ramës, do nxjerrë të vërtetën e madhe”, shtoi.
Më tej, shpjegoi edhe skemën, që sipas tij, ka përdorur kreu i qeverisë.
“Pronarë mediash, biznesmenë të mëdhenj dhe persona të tjerë që merreshin me aktivitete fitimprurëse, ky bënte listën ua jepte njerëzve të vet, këta komunikonin me njerëzit atje dhe ata ndërronin logot. Pra, në vend të Deripaskës dilte i sanksionuar emri i shqiptarëve, këta i takonin më pas e u tregonin ‘duhet të heqësh emrin, hajde se kemi një mik dhe e dimë të gjithë se sa takime janë kryer. Janë bërë disa takime në Tiranë, në Vienë dhe kudo. Besoj se këta persona do të flasin sepse kjo histori është hapur e nuk do të mbyllet më. Lista besoj do jetë më e gjatë”, tregoi.
“Kemi të bëjmë me një mafie ndërkombëtare që në Shqipëri ka gjetur parajsën e vet”, tha Meta.
Më tej, kreu i PL u shpreh se është e padiskutueshme që Edi Rama ka lobuar që ish-Presidenti të shpallet “non grata”. “Po ky nuk ka qenë asnjëherë shqetësim i imi”, shtoi ai.