Ndarja nga jeta e një nëne të re vetëm katër ditë pasi kishte sjellë në jetë fëmijën e saj në maternitetin “Koço Gliozheni” në kryeqytet, ka bërë që institucioni në fjalë të reagojë me një deklaratë për mediat.
Në lidhje me vdekjen e 30-vjeçares, nga spitali theksohet se ka ndodhur 4 ditë pasi ajo kishte lënë ambientet e tyre.
Sipas sqarimit, nëna e re është paraqitur në maternitet me gjendje debulese, ndërsa lindja e saj kishte qenë natyrale dhe kishte shkuar më së miri, duke sjellë në jetë një foshnje të shëndetshëm.
Po ashtu bëhet me dije se e reja ishte shtruar në spital më datë 28 janar dhe nuk ka referuar asnjë patologji shoqëruese.
REAGIMI:
Materniteti “Koco Gliozheni” i shpreh ngushëllimet familjarëve të së ndjerës me inicialet M.V., e cila ka ndërruar jetë disa ditë pas lindjes së foshnjës.
30-vjecarja është shtruar në spitalin tonë më datë 28 janar dhe nuk ka referuar asnjë patologji shoqëruese.
Lindja natyrale ka shkuar mirë, duke sjellë në jetë një djalë të shëndetshëm. Pas 48 orësh qëndrimi në spital, ku ka marrë shërbimin e nevojshëm, nëna ka dalë nga spitali me dëshirën e saj, në gjendje shëndetësore të stabilizuar.
Disa ditë pas lindjes nëna e re është paraqitur në spital me dobësi trupore dhe menjëherë, pacientja është shtruar në repartin e terapisë intensive, ku është trajtuar komform të gjitha protokolleve mjekësore.
Pavarësisht përpjekjeve të stafit mjekësor, gjendja e pacientes është rënduar në mënyrë të shpejtë, duke ndërruar jetë. Priten rezultatet e Mjekësisë Ligjore për të mësuar shkakun e humbjes së jetës së pacientes.
