Familjarët e 30-vjeçare Mimoza Veizaj, e cila humbi jetën në maternitetin “Koço Gliozheni” 4 ditë pasi kishte lindur fëmijën e saj, kanë tërhequr sot nga morgu trupin e saj.
Ata kanë folur për mediat jashtë kamerës duke hedhur akuza të forta në drejtim të mjekëve që trajtuan nënën e re.
Sipas familjarëve mjekët kanë neglizhuar gjendjen e rënduar të Mimozës, në një kohë që ajo shprehej se kishte dhimbje pasi i doli efekti i gjilpërës.
“Faji është i doktorit, i ka bërë gjilpërë shumë. Ta fusnin në sallë te operimit nëse nuk ka pasur mundësi të lindte vetë. Mjekët duan lekë. Kishte dhimbje këmbësh, na tha se po më del gjilpëra, efekti i gjilpërës dhe kishte dhimbje të forta. Doktorët e shikonin të vuante dhe s’e preknin me dorë”, janë shprehur ata.
Sipas tyre, 30-vjeçarja nuk kishte pasur asnjë problem shëndetësor më parë dhe është paraqitur në spital me ankesa për dhimbje brinjësh dhe këmbësh, ndërsa dyshimet janë për trombozë.
“Analizat kanë qenë të shkëlqyera. Asnjë shqetësim nuk ka pasur goca jonë. 30 vjeç, asnjë lloj sëmundjeje nuk ka pasur”, kanë shtuar më tej.
Sakaq mësohet se nëna e re që ndërroi jetë pasi lindi djalin e saj kishte 3 vjet që ishte zhvendosur së bashku me të shoqin nga Ballshi në Tiranë, ku jetonte me qira, ndërsa fëmija që solli në jetë ishte i pari për të.
