Kanë dalë para gjykatës gjermane, dy shqiptarë të akuzuar për vrasjen e një ish-oficeri ushtarak më 9 janar të vitit 2017.
Dyshohet se këta të fundit vranë me 5 plumba ish-oficerin e Policisë Ushtarake, Kujtim Prenga, 46 vjeç.
E ashtuquajtura vrasja për hakmarrje gjaku që ndodhi në Visselhövede u bë tituj në mediat gjermane dhe ato shqiptare në vitin 2017.
Njëri prej autorëve të vrasjes është dënuar, ndërsa dy të pandehur të tjerë janë aktualisht në gjyq. Ndërkaq është zbardhur dhe roli i tyre, ku mësohet se njëri nga të dy ka qenë ai që ka tërhequr këmbëzën.
Si ndodhi ngjarja?
Sipas mediave gjermane, ngjarja ka ndodhur gjatë ditës së hënë 9 janar 2017, ndërsa 46-vjeçari shqiptar u qellua, gjatë kohës që po merrte vajzën e tij nga një shkollë fillore.
Dy persona të armatosur të cilët lëviznin me motor i janë afruar dhe e kanë qëlluar shqiptarin në sy të vajzës së tij përpara shkollës. Pas kësaj autorët janë larguar me shpejtësi, ndërsa shqiptari, u transportua me urgjencë në spital, ku ndodhej në gjendje të rëndë deri më 13 janar kur edhe ndërroi jetë për shkak të plagëve të marra.
Më 25 prill 2017 policia e Rotenburger në bashkëpunim me atë të Hanoverit, arrestuan një 22-vjeçar, i dyshuar si bashkautor në vrasjen e 46-vjeçarit. I riu ka pranuar para agjentëve të policisë pjesëmarrjen ne vrasje.
Ndërkohë, sipas raportimeve të mediave,Kujtim Prenga, ish-oficer i Policisë Ushtarake, ishte arrestuar dhe dënuar në Shqipëri pasi mesnatën e 30 dhjetorit të vitit 2011 vrau në një lokal me muzikë në Kamëz 28-vjeçarin Armando Frroku.
Prenga atëherë 41-vjeçar punonte si badigard në lokalin me muzikë, kur i riu, i cili dyshohej se ishte nën efektin e pijeve alkoolike pati një sherr për të cilin ndërhyri si roje sigurie Kujtim Prenga. Në sherr e sipër, Prenga qëlloi Armando Frrokun duke e lënë të vdekur. Ai u arrestua pas ngjarjes dhe deri në vitin 2016 ka qenë në burg.
Në muajt e parë të 2016 Kujtim Prenga u largua në drejtim të Gjermanisë ku ishte strehuar në një kamp dhe kishte kërkuar azil bashkë me familjen e tij, me frikën e një hakmarrjeje të mundshme.
Për tu qëlluar për vdekje 1 vit më vonë.
