Për Sali Berishën zhdukja e Edi Ramës nga ekrani për mëse një javë pasi shpërtheu skandali McGonigalë është produkt i “Kodit të Heshtjes” që atij i është kërkuar të zbatojë nga ambasadorja e SHBA-ve në Tiranë, Yuri Kim.
Për këtë Berisha bëri thirrje që qeveria e SHBA-ve të hetojë thellësisht marrëdhënien e diplomates së tyre në selinë e Rrugës së Elbasanit me kryeministrin e Shqipërisë, por edhe me ish-kryedemokratin Lulzim Basha, i cili hesht në një kohë që është zbuluar se Rama pagoi ish-zyrtarin e FBI për “ta fundosur” me dosjen e financimeve ruse.
“Burime të besueshme më kanë informuar se në heshtjen e Edi Ramës, një rol të veçantë ka guvernatorja Yuri Kim, e cila i ka kërkuar atij të mos bëjë asnjë deklaratë dhe këto burime informojnë se deklaratat qesharake e Ramës për të përgënjeshtruar miqësinë me McGonigal, ka qenë një këshillë e guvernatores. Këto janë çështje të hetimit, uroj që qeveria e SHBA të hetoj këto marrëdhënie. Në këto momente kur flet gjithë bota, kur ziejnë mediat e botës, ajo që bën përshtypje më të madhe dhe viktimë Basha ka mbyllur gojën si me zinxhir”, tha Berisha.
Duke mos e kursyer aspak Bashën, ai e akuzoi se po bashkëpumnon me Ramën dhe me Kim për të sfumuar jehonën e dosjes McGonigal me heshtje. Sipas Berishës, ish-kreu i PD është bërë palë me kriminelin që e vrau atë politikisht dhe si viktimë e ka “kyçur” gojën në momentin kur duhet të fliste për të vërtetën.
“Krimineli që e vrau atë, përdori një nga njerëzit më të fuqishëm në fushën e zbulimit kundër tij, tani nuk flet prej 7 ditësh asnjë fjalë sikur nuk ekziston. Ftoj shqiptarët të pyesin si ka mundësi që ky njeri tani që u bë e qartë se Edi Rama ka përdorur McGonigal si vrasës me pagesë në aferën Muzin kundër tij nuk thotë një fjalë të vetme. Gjithçka flet se përsëri guvernatorja qëndron prapa heshtjes së turpshme. Mirë Rama që është autor i një vepre makabre, po viktima e tij si nuk gjen forcë të shqipërojë një fjalë të vetme. I bëj thirrje çdo shqiptari të shtrojë pyetjen, çfarë ndodh, si ka mundësi, a ka një detyrim minimal ky njeri, qoftë dhe ndaj atyre njerëzve që e kanë mbështetur deri në fund të bëjë transparencë dhe kush i bën presion për të mbyllur gojë”, theksoi Berisha.
Më tej ai nënvizoi se në situatën e re të krijuar Basha ka një detyrim për të thyer “Kodin e Heshtjes” që “respektohet me fanatizëm nga krimineli dhe viktima dhe zbatohet nga guvernatorja që nuk ka lënë gjë pa komentuar”.
“Për një thikë pas shpine që njerëzit e saj të preferuar i përkëdhelte e bënte çtë donte me ta, nuk ka një fjalë të vetme. si është e mundur kjo? Çfarë interesash përfaqëson guvernatorja. A mund të shpjegojë kush? A ka shqiptar që nuk pret reagim për këtë ngjarje? Sërish ju them unë, komentet për këtë ngjarje janë përvëluese për ata që janë të implikuar në të. Në llojin e saj, guvernatorja është e implikuar në McGonigal“, u shpreh ai.
