Nga Boldnews.al
Disa javë më parë, Belind Këlliçi, kandidati i opozitës së bashkuar për Tiranën në zgjedhjet lokale të 14 majit, publikoi disa dokumente që faktonin se Bashkia e Tiranës kishte shtruar një rrugë para se të bënte letrat e tenderit.
Një denoncim i fortë, i cili duhet të ishte indicie e fortë për çdo organ ligjzbatues për të vënë para përgjegjësisë cilindo që abuzon me detyrën. Por, në vendin tonë, skandali më i rëndë nuk po zgjat më 3 ditë, por vetëm 3 orë. SPAK apo Prokuroria e Tiranës nuk kanë lajmëruar për ndonjë hetim të mundshëm. Kjo ka sjellë që Veliaj të marrë “zemër”, teksa ka përshpejtuar një super tender elektoral.
Me një vlerë tepër të madhe, kur Komisioni Qendror i Zgjedhjeve ka ligje të veçanta që ndalojnë paratë publike të përdoren në zgjedhje.
Megjithatë, cilido institucion bën përjashtime për Veliajn, i cili duket se ka një suport tepër të madh nga institucionet e tjera, media apo edhe eksponentë të opozitës.
Sipas dokumenteve që disponon BoldNews.al, Bashkia e Tiranës ka gati procedurën tenderuese për asfaltin para zgjedhjeve të 14 majit. Veliaj po shpenzon një “mal me para’” për këtë tender, duke dashur që t’u hedhë hi syve banorëve të Tiranës.
Mësohet se objekti i procedurës së prokurimit është “rehabilitimi i infrastrukturës rrugore”. “Autoriteti kontraktues është Bashkia e Tiranës, ndërkohë që fondi limit për këtë tender është 1.666.666.666 lekë” thuhet në dokumente, ose me TVSH rreth 16 milionë euro.
Ky tender vjen disa javë pasi Veliaj u denoncua nga Këlliçi për asfaltin 400 milionë lekësh. Gjithçka lidhet me fasadën që Veliaj tentoi t’u shiste banorëve të Tiranës mbrëmjen e 6 janarit, teksa kasetat e shpërndara nga zyra e shtypit në bashki e shfaqnin atë në rrugën “Xhon Belushi” të njësisë 4, ku do të niste asfaltimi.
Kronika e gatshme ishte aq e pastër dhe e nxirrte Veliajn si punëtorin që s’fle natë e ditë për të “bërë xixë” rrugët e Tiranës, por më shumë sesa për punë, kryebashkiaku kishte shkuar në këtë rrugicë midis zonës së Freskut dhe Kinostudios për të orkestruar vjedhjen e radhës.
Dhe këtë fakt e zbuloi rivali i tij, Belind Këlliçi, i cili të premten nxori në një emision televiziv disa dokumente që tregojnë se për rrugën “Xhon Belushi”, nga bashkia Tiranë është hapur një tender në 19 dhjetor 2022 dhe dorëzimi i dokumenteve supozohej që ligjërisht të përfundonte më 9 janar 2023. Ashtu sikurse shihet në dokument, fondi limit për asfaltimin e kësaj rruge ishte 41 milionë lekë të reja.
Fakti që ngriti dyshimet për abuzimin e radhës të Veliajt me paratë e taksapaguesve ishte se punimet nga makineritë në zonë nisën ende pa u shpallur fituesi i tenderit (shpallej më 22 janar) dhe se në krye të detyrës ishin punonjësit e bashkisë Tiranë me makineritë shtetërore dhe jo një firmë private.
