Ditën e sotme Partia Socialiste ka depozituar në SPAK një kallëzim të ri për dosjen e “21 janarit” ku mbetën të vrarë 4 protestues përballë Kryeministrisë.
Gjatë një deklarate për mediat, Sekretari i Përgjithshëm i PS-së, Damian Gjiknuri tha se audio-përgjimi i nxjerrë së fundmi në media është një provë e re për të zbardhur autorët e 4 vrasjeve të bujshme.
Gjithashtu Gjiknuri i bëri thirrje SPAK që të marrë në shqyrtim këtë provë të re dhe të vërë para përgjegjësisë autorët.
“I bëjmë thirrje prokurorisë që t’i marrë në shqyrtim provat e reja. S’ka gjë më të rëndë se vrasja e qytetarëve. Çdo akuzë duhet zbardhur, aq më tepër kur qytetarët vriten nga shteti. Sot do të depozitojmë këtë kallëzim penal. Ish-ministri i Brendshëm dhe ish-kryeministër, ata duhet të zgjidhin këtë faj. Ata janë bashkëpunëtor në një krim që s’duan të zbulohet. Ky fakt i ri i ka të gjitha mundësitë për të vënë këtë çështjes në dispozicion të prokurorisë”, tha Gjiknuri.
