Kreu i Partisë së Lirisë, Ilir Meta ka përshëndetur marrëveshjen e nënshkruar midis Partisë Demokratike dhe PBDNJ për zgjedhjet e ardhshme lokale të 14 majit.
Gjatë një statusi në rrjetet sociale, Meta shkruan se kjo marrëveshje është një hap i rëndësishëm bashkëpunimi për t’i siguruar fitoren e opozitës në zgjedhje. Meta thekson se më 14 maj qytetarët do t’i japin fund qeverisë së korruptuar dhe me votën e tyre do të vendosin me “shpatulla pas murri” kryeministrin Edi Rama.
“Përshëndesim marrëveshjen e sapo nënshkruar midis Partisë Demokratike dhe PBDNJ, si një hap i rëndësishëm i bashkëpunimit dhe bashkimit të opozitës për Fitoren e Ndryshimit në 14 Maj, për t’i dhënë fund monizmit në pushtetin vendor dhe rivendosur Llogaridhënien dhe kontrollin e qytetarëve!”, shkruan Meta.
Tre bashki në Jug të vendit që janë lënë si zona të lira për aleatët dhe nuk u përfshinë në procesin e Primareve të PD, edhe zyrtarisht do të jenë në dorën e PBDNJ-së.
