Nga ceremonia për 32-vjetorin e themelimit të Partisë Demokratike në Elbasan, kreu i saj Sali Berisha u ndal te disa nga problemet që has ky qytetet nën menaxhimin e socialistëve dhe qeverinë Rama.
Për ta ilustruar dramën që ka mbërthyer jetën e çdo qytetari, Berisha krahasoi diktaturën me lidershipin e Rilindjes, duke thënë se komunizmi i la këtij Elbasanit si trashëgimi një kombinat “sëmundjesh vdekje prurës”, ndërsa Rama solli “uzinën më të madhe të miellit të partisë në Ballkan”, duke iu referuar këtu laboratorëve të kokainës që janë gjetur në qytet.
“Në rast se diktatura la si trashëgimi këtu një kombinat sëmundje dhe vdekje mbjellës, në rast se Edi Rama solli këtu uzinën më të madhe të miellit të partisë në Ballkan, PD e shndërroi Elbasanin në pjesë integrale të metropolit të shqiptarëve. Sot destinacioni më i afërt nga qendra e Tiranës është Elbasani. Elbasani ka qenë djep i atdhetarisë dhe traditës. PD kaloi një periudhë të pashembullt, ndoshta ndonjëherë, e vërteta është që ajo para alternativës “to be or not to be”, kjo sepse njeriu që drejton ekzekutivin shqiptar është një politikan që s’ka asnjë vlerë, parim e ideal. Njeri i cili u vërsul mbi opozitën e shfrytëzoi dobësitë e drejtimit të saj, mori peng kreun e saj. Shkatërroi votën e shqiptarëve, u rrëmbeu votën, e zhvlerësoi atë, e përzuri atë nga partia e tij. Bëri që dhe në partinë tonë 1958 të quhet 5200. Por ne prapë u ngritëm, në kushte të vështira e në një mision që shumë e shikonin si mision të pamundur, por jo”, tha Berisha.
Dhe si për të treguar diferencën midis drejtimit të qeverisë nga PD dhe PS, Berisha theksoi se kur ai ishte kryeministër u hodhën themelet e një autostrade që e shndërroi Elbasanin në pjesë integrale të metropolit të shqiptarëve.
“Ju sot duhet të jeni krenar sepse e thënë edhe njëherë, nga shpallja e pavarësisë, PD-ja realizoi këtu veprat më të rëndësishme, realizoi shoqërinë e lirë, gjallëroi dhe fuqizoi të gjitha dhuntitë e qytetarëve të Elbasanit, traditën e tyre të shkëlqyer, shkollat, universitetet. Në rast se diktatura la si trashëgimni këtu një kombinat sëmundje dhe vdekjendjellës, në rast se Edi Rama solli këtu uzinën më të madhe të miellit të partisë në Ballkan, PD e shndërroi Elbasanin në pjesë integrale të metropolit të shqiptarëve. Sot destinacioni më i afërt nga qendra e Tiranës është qendra e Elbasanit. Elbasani ka qenë djep i historisë dhe traditës. Ne u themeluam si parti e interesit kombëtar dhe e mbrojtëm atë. Asnjë parti tjetër nuk ishte në kushte më të vështira se ne. Jo vetëm se ne u themeluam tërësisht bazuar në idealet tona dhe realisht pa asnjë ndihmë konkrete nga askush se i tillë ishte izolimi i Shqipërisë, edhe ambasadat ishin të mbyllura për shkak të 2 korrikut”, nënvizoi ai.
