Kryetari i Partisë së Lirisë, Ilir Meta ka komentuar notën verbale që Shqipëria i dha ambasadorit britanik, Alastair King-Smith për deklaratat kundër emigrantëve shqiptarë në Mbretërinë e Bashkuar.
Në një intervistë për Vizion Plus, Meta thotë se qeveria shqiptare duhet të shohë më parë përgjegjësitë tek vetja e saj. Sipas Metës, qeveria duhet që të gjejë mënyrën për të ndaluar emigrimin masiv të të rinjve shqiptarë dhe jo t’i vendos gishtin shteteve të tjera.
Meta: Mendoj që është shumë më e rëndësishme që qeveria shqiuptare të gjejë përgjegjësitë e saj për këtë largim që u bën të rinjve të saj. Është shumë e lehtë të bëjë përgjegjëse Francën apo Britaninë. Nëse kjo është bërë çështje në Britani nga ministrat për politikë, sërish duhet gjetur përgjegjësia këtu se pse diskutohet për shqiptarët. Nuk ka të bëjë me një ndjenjë e cila ka një lloj diskriminimi ndaj shqiptarëve. Është kthyer në një problem çështja e emigrtantëve tanë për shkak të numrit në rritje, është e pakrahasueshme. Këtë duhet të shohë qeveria e Shqipërisë.
Më pas, kryetari i Partisë së Lirisë është pyetur edhe për përgatitjen e opozitës për zgjedhjet vendore të 14 majit. Meta u shpreh i bindur tek fitorja e opozitës, teksa shtoi se qëllimi i saj nuk është vetëm të fitojë sa më shumë bashki, por të rikthejë llogaridhënien në vend.
Meta: Nuk e besoj se opozita nuk është gati. Opozita ka dalë me kandiadatët e saj. Duhet të ketë ritme më të lartë organizimi dhe koordinimi për ballafaqimin me çdo tentativë të mazhorancës dhe këtij shteti mafioz për të cenuar votën e qytetarëve.
Qëllimi ynë nuk është për të marrë disa bashki më shumë apo më pak. Qëllimi ynë është të kthejmë llogaridhënien në nivel vendor. Fitorja e opozitës në pushtetin lokal. Edhe marrëveshjen që kemi bërë me PD, kemi një angazhim të veçantë, për këshillat bashkiak. Kemi qëllime më të mëdha se sa morëm një bashki më shumë apo më pak.
Pyetje: A ishte Belind Këlliçi në primaret e PD-së për Tiranën?
Meta: S’kemi pasur preferencë të veçantë individuale. Nuk shoh asnjë skenar tjetër përveç fitores. Padyshim që mundësitë dhe potenciali është në të gjithë vendet. Kemi super kandidatë në Durrës, Tiranë dhe Elbasan. Janë ata që identifikohen me ndryshimin. Me integritet të lartë, figura qytetare. Krejt ndryshe nga modeli arrogant i aktualëve.
Pyetje: Opozita sa mandate të sigurta ka?
Meta: Nuk them asnjë shifër të sigurt por me bindje them që opozita do fitojë.
