Grupet kriminale në Shkodër mbikëqyrnin territorin përmes kamerave të vendosura në mënyrë të jashtëligjshme në rrugët e qytetit, zbulim ky i bërë nga vetë policia, që njoftoi dhe çmontimin e 21 prej tyre.
Për këtë ngjarje ka reaguar dhe kreu i Partisë Demokratike Sali Berisha i cili ka akuzuar qeverinë Rama, duke e cilësuar një narkoshtet.
Gjithashtu thekson se jo vetëm Shkodra, por e gjithë Shqipëria është nën sundimin e krimit.
“Krimi kontroll të rreptë të territorit.
Bandat kanë vendosur krahas policisë kamera speciale në shtyllat elektrike në rrugët dhe sheshet e qytetit të Shkodrës për kontrollin e qytetit. Si Shkodra, në sundimin e krimit është e mbarë Shqipëria. Bandat kontrollojnë jo vetëm territorin, por dhe vendimarrjen: në rruge, në zyra, në polici, gjykata, prokurori, qeveri, parlament dhe çdo gjë! Ky është narkoshtet!”, shkruan Berisha.
Ditën e sotme burime zyrtare konfirmuan se aksioni nga strukturat hetimore të DVP Shkodër erdhi “bazuar në informacionet e siguruara nga inteligjenca informative, për vendosjen e disa kamerave në shtyllat elektrike, në aksin rrugor ‘5 Heronjtë’, deri në bypassin e Shkodrës, dhe nga ‘5 Heronjtë’, deri të rrethrrotullimi i Dobraçit, me qëllim mbledhjen e informacionit për qëllime kriminale, si dhe për të monitoruar lëvizjet e Policisë”.
Mbështetur nga shërbimet operacionale dhe ato të Forcës së Posaçme “Shqiponja”, strukturat hetimore të DVP Shkodër kanë çmontuar dhe sekuestruar 21 kamera të lidhura nëpërmjet celularit, nga të cilat 8 të instaluara në vende dhe sheshe publike, në aksin rrugor nga rrethrotullimi “5 Heronjtë” deri tek rrethrrotullimi i parë i bypassit të Shkodrës, ndërsa 13 të tjera të instaluara në aksin rrugor nga rrethrrotullimi “5 Heronjtë” deri te rrethrrotullimi i Dobraçit.
Kamerat e sekuestruara ishin vendosur pa lejen përkatëse të organeve kompetente.
“Vendosja e tyre është në kundërshtim me Ligjin 9887, datë 10.03.2008 ‘Mbrojtja e të dhënave personale’ dhe përbën veprën penale ‘Ndërhyrje të padrejta në jetën private’, që parashikohet nga neni 121 i Kodit Penal”, saktësohet në një njoftim të policisë.
