Oficerët e Drogës në Igumenicë kishin informacion për llojin e makinës që do të përdorej për të transportuar një ngarkesë të madhe me kanabis të papërpunuar të importuar nga Shqipëria dhe e pikasën atë duke lëvizur në qytet me një shofer shqiptar 42-vjeç, shkruan medie greke Prothema.
Menjëherë e kanë ndaluar për ta kontrolluar dhe brenda bagazhit kanë gjetur 32 pako kanabis të papërpunuar me një peshë totale 34 kg e 608 gram dhe si pasojë kanë vënë në pranga shoferin shqiptar, i cili kishte mbi vete një pako të vogël me kokaine dhe dy aparate celulare të cilat janë konfiskuar së bashku me automjetin.
Ndaj autorit 42-vjeçar është ngritur një dosje për import, transport, trafik dhe posedim të lëndëve narkotike në shkallën e veprës penale dhe është dërguar në Prokurorinë e Rrethit Thesproti.
Oficerët kërkuan që komunikimet e tij celulare të deklasifikoheshin për të konstatuar se kujt po ia dorëzonte ngarkesën.
